Naatitat nutaat Nunavummi nuannaartitsisut

Nunavummi King Williamip qeqertaani nunaqarfituaq tassaavoq Orsortooq, Nunavummi Sullualuup sineriaani inissisimalluni.

Naatitat tamaani pissarsiariuminaattarput. Naatitat pisiniarfituami pisiarineqarsinnaasut ilaatigut asiulersimasarput akisoqalutillu.

Orsortuumili naggueqatigiit Inuit akornanni marluk, Betty Kogvik Susie Kununakilu naatitanik nammineq naatitsisalernissartik aalajangersimavaat, cherrytomatit salatillu containeritoqqat ilaanni naatitsisalerlutik.
Containerit pingasut katillugit naatitsiviliortoqarpoq, containerillu taakku issittumi misissuivittut aamma atorneqarput, seqinermit anorimiillu nukissiuutit atorlugit kiassarneqarluni.

Containerimi naatitsivik Naurvik-mik taaguuseqarsimavoq, salatillu ineritinneqartut siulliit nunaqarfiup utoqqartaannut agguaanneqarlutik.

Nunaqarfimmiut utoqqartaasa ilaat salatimik pajunneqarami nuannaangaarami qitaasattuinnanngortoq, Betty Kogvikip  CBC Newsimut oqaatigaa.

Salatinik cherrytomatinillu maannamut naatitsisinnaanertik Betty Kogvikip Susie Kununakillu nuannaarutigaat, qeriuaannartullu masarsuini naasut ilaannik upernaaru naatitsisalersinnaanissartik aamma neriuutigaat, soorlu aamma kigutaarnanik uluusiinillu naatitsisalernissartik pilersaarutigigaat.

Naurvimmik taallugu suliniut aqqutigalugu nunaqarfimmiut naatitanik nutaajusunik pilersorneqarsinnaanissaat eqqarsaataavoq, inuussutinimmi nunaqarfimmut pilersuinerup aalakkaanerusunngortinniarneqarami.
Suliniut iluatsissappat, Nunavummi nunaqarfinni allani aamma misilerarneqalissaaq.