Frimærki Kalaallit Nunaanneersoq taasisitsilluni unamminermi ajugaasoq
Europami allakkeriviit ataatsimoorfiata Sepac-ip, Small European Postal Administration Cooperations-ip, TELE-POST-ip ilaasortaaffigisaata, taasisitsilluni unammisitsinermik aaqqissuussinerani nunarsuarmit tamarmit frimærkinik katersisartut frimærki nunatsinneersoq 2013-imi Sepac-frimærkiatut toqqarpaat. Sepac-frimærkit aqqaneq-marluk toqqagassanngortinneqarsimapput.
Uumassusilerisup assilisaa
Uumassusilerisoq Lars Holst Hansen assimik assiliisuuvoq, taanna Tunup avannaani misissuiffimmi Zackenbergimi sulisuuvoq. Asseq qanoq ilillugu iluatsissimanerlugu ima oqaluttuaraa:
- Umimmammik pannermik assilisaq assiliivimmit nammineq assiliisartumit assilisaavoq, uangalu assiliinerup nalaani uumasup assiliiviulluunniit eqqaaniinngilanga.
- Juunimi maluginiarpakka umimmaat marlussuit taserannguami naanernut issigissunut uteqqiasut assiliivillu tamaanga inissillugu.
Uumasunik nunatsinneersunik assilisat nuannarineqartarput
Frimærkinut pisortap Allan Pertti Frandsenip nersuiniarneq assut nuannaarutigaa:
- Frimærkinik katersisartut frimærkiliatsinnik toqqaasimanerat TELE-POST-imi tulluusimaarutigaarput.
- Frimærkinik katersisartunit misilittakkatta paasitippaatigut uumasunik nunatsinneersunik assilisat assut nuannarineqartartut, nunarsuarmilu tamarmi katersisartut akornanni assut pilerigineqartartut.
