Frimærkit atorlugit isiginnaartitsisartut aningaasaliiffigaat
Checki tunniunneqarpoq Tele Postip Nuummi allaffeqarfiani tassanilu Nunatta isiginnaartitsivia sinnerlugu Svenn B. Syrin, allakkerinermut pisortaq Per Svendsen aamma frimærkinut akisussaasoq Allan Pertti Frandsen Tele Post sinnerlugu najuupput.
- 2010-mi aalajangerpugut frimærki immikkut sanatitassarput isiginnaartitsisartunut Silamiunut iluaqutissanngortinneqassasoq taakkulu tassa ukiut ingerlaneranni Nunatta isiginnaartitsiviatut ingerlalerput. Taakkuupput frimærkip tunineranit sinneqartoorutinik ullumi tunineqartussaat. Frimærkilu taanna tunisaalluarmat aningaasat 100.000 koruunit tunniunneqarput assullu nuannaarutigalugulu tulluusimaarutigaarput Nunatta isiginnaartitsivianut tunniussinnaagatsigu, Allan Pertti Frandsen oqarpoq.
Checki 100.000 koruuninik aningaasartalik allakkerinermut pisortap Per Svendsenip isiginnaartitsinermut pisortamut Svenn B. Syrin-imut tunniunneqarpoq, taannalu tulluusimaaqaluni qujassuteqarluni oqaaseqarpoq.
- Aningaasat ilimagisatsinniit amerlanerupput tamannalu nuannaarnermik anginerulersitsiinnarpoq. Aningaasat pilersaarummut ilusinilersumut atussallugit aalajangerpugut. Tassa sunngiffimmi isiginnaartitsisartut sineriammi aallarnissarnissaat sulissutigaarput, sineriammi isiginnaartitsinermik misileerusuttut periarfissaqalerniassammata. Maanna aningaasanik tunineqarnitsigut ileqqunnguussinnaasutut kissaatigisarput aallarnisarsinnaanngorparput, Svenn B. Syrin oqarpoq.
