Nannunnianut tapiineq: Namminersorlutik Oqartussat aningaasartuutinut tapiissuteqartalerusuttut

Nannunniat Inatsisartunit taperserneqartussanngungajalerpasipput.

Nannut amiinik ammerinermut aningaasartuutit affaasa Namminersorlutik Oqartussanit akilerneqartalernissaannik siunnersuut ilaatigut Siumumit, Inuit Ataqatigiinnit aamma Partii Naleqqamit taperserneqarpoq. Partii Nalerarlu tamatumunnga siunnersuuteqartuuvoq. 

Tamanna nannunniat nannuttamik amianik assartuinermut ammerinermullu akissaqarnerulernissaannut iluaqutaasinnaavoq. 

AAMMA ATUARUK Tunumi nannunik kisitsinissamut suliniut kinguartinneqartoq

Nannut amii nunani tamalaani maannakkorpiaq niuerutigineqaqqusaanngillat. Tassa imaappoq, nannut amii nunatsinniinnaq niuerutigineqaqqusaapput, tamannalu nannunniat aningaasiviinut eqquivoq.  

Siunnersuut akuerineqassaguni nunatta karsianut ukiumut 85.000 koruuninik akeqassaaq.   

Nannunniarneq amiisalu niuerutigineri kulturitsinni pingaarutilinnut ilaasoq nannunniarnermillu inuussutissarsiutillit taperserneqarnissamik pisariaqartitsisut, Jens Napaattooq Partii Naleqqameersoq isumaqarpoq.

- Nunatta karsia tamatumunnga aningaasartuuteqangaarnavianngilaq, tamannali nannunnianut ataasiakkaanut ajornartoorfimmi iluaqutaasinnaaqaaq, Jens Napaattooq Inatsisartunut siunnersuummini allappoq.

Demokraatit siunnersuut akerleraat. Nannunniat nannuttamik amiinik tunisinerminni maanna akilerneqarluartareermata tapiiffigineqartarnissaat Demokraatit pisariaqarsorinngilaat.

Nunatta Ammerivia nannut amiinik ukiumut 20-t 30-llu akornnaniittunik tunitsiviusarpoq. Tapiissuteqarneq taakku amerlinerannik kinguneqassasoq, politikerit ilimagaat.

Siunnersuut Inatsisartuni ataasinngornermi maajip ulluisa 25-anni aappassaaneerneqassasoq ilimanarpoq. Taanna uani atuarsinnaavat.