Tunumi nannunik kisitsinissamut suliniut kinguartinneqartoq

Tunumi nannut pillugit ilisimatuut paasissutissaateqarpianngillat, taamaattumik nannut qanoq amerlatiginersut qanorlu inooriaaseqarnersut Pinnngortitaleriffimmit paasiniarneqalerpoq.

Suliniuteqarneq 2015-imiilli aallartinneqarpoq, ilisimatuullu Tunup kujataatungaani Tunullu avannaarsuani Station Nordi tikillugu misissuisoqarpoq.

Ilisimatuut Ittoqqortoormiit kingulliullugu misissuiffigisussanngoraluarpaat, tamaani nannut amerlassusaat paasiniarlugu nannunik nalunaaqutsiisoqartussaagaluarpoq.

Nannunilli nalunaaqutsiinissaraluit coronamik nappaalasoqalernerata kingunerisaanik killilersuisoqarnera pissutigalugu Pinngortitaleriffiup nalunaaqutsersuinissaq ukiumik ataatsimik kinguartippaa.

Timmisartumit kisitsinissat aappaagumut aamma kinguartinneqarput, Pinngortitaleriffimmi miluumasunut immikkoortortaqarfimmi pisortaq, Fernando Ugarte oqarpoq.

- Nannut sumiinnerannik paasissutissat tamakkerlugit pissarsiarereerutsigit timmisartumiit aappaagu kisitsinissaq pilersaarutaagaluarpoq, ukiumilli ataatsimik kinguartitsisoqarpoq, Fernando Ugarte oqarpoq.

Nannunik nalunaaqutsiinerit biologinit ataqatigiissaarisartumik piniartunillu inuttaqartarput, USA-miit, Nuummiit Norgemiillu inuttaqartarlutik, peqataasussalli nunaminniit aallarsinnaanngikkunik Island aqqusaarlugu Nerlerit inaannut timmisartorsinnaannginnamik anngussinnaanngillat.

– Ittoqqortoormiini nannunik nalunaarsuinissaq ukiumik ataatsimik kinguartinneqarmat, nannullu kingulliit pilersaarutit taamaaginnassappata 2021-mi nalunaarsorneqassapput, 2022-milu timmisartumit kisitsisoqarsinnaanngussalluni, Pinngortitaleriffimmi miluumasunut immikkoortortaqarfimmi pisortaq, Fernando Ugarte oqarpoq.

Pinngortitaleriffiup nannut pillugit suliniutaa ukiumut 3 milliuunit koruuninik naleqarpoq, aningaasaliissutillu amerlanersaat Danmarkimi Avatangiisunut aqutisoqarfiup akilertarpai.