Red Barnet: Meeqqasi internettimik qanoq atuinersut nakkutigilaarisigit
Momo challenge tassaavoq nittartakkakkut attaveqaqatigiittarfikkut facebookkikkut assigisaatigullu meeqqanut inuusuttunullu allalluni inatsiniapiluttartoq, nunarsuarmi ima siaruassimalertoq. Taanna ilaatigut imminut ajoqusernissamik inatsipilulluni, siorasaarilluniluunniit meeqqanik inuusuttunillu uppertitsiniaalluni annilaangalersitsisinnaavoq.
Maanna taanna Danmarkimi aamma siaruaalluni allartereersimammat, nunatsinnut siaruaatinnginnerani peqatigiiffiup Meeqqat Ikiortigit, Red Barnettip, angajoqqaat kaammattorpai, meeqqamik nittartakkakkut atuisarnerannik alapernaaqqullugit.Maanna aamma Nuummi atuarfiit ilaat angajoqqaanut allakkatigut saaffiginnissuteqarsimalerput atuartuutiminnik momo pillugu tusagaqassaluarpata ilinniartitsisumut piaartumik saaffiginnissasut.
Momo arlalinnik inuttaqarpoq
Momo ilisimasalinnit tassaasorineqarpoq inuit arlallit meeqqanut inuusuttunullu isumassaanik sunniiniapiluttartut. Meeqqat inuusuttullu suli eqqarsartaatsimikkut inerivinnikuunngimmata taamatut sunniiniartarneq navianarluinnarsinnaasoq Meeqqat Ikiorfiit siulittaasua, Jonna Ketwa oqarpoq.
- Momo tassaasorineqarpoq inersimasut arlaliusut, meeqqanik inuusuttunillu sianiginngisaanik isumassaannik sunniiniaasut. Meeqqat inuusuttullu kinaassusii inerinnikuunngillat, taamaattumik isumassanik sunniiniaanerit momop atortagai paasisinnaanngilai akiorsinnaanagillu.
Taassuma meeqqat, inuusuttut angajoqqaallu momomik arlaatigut tusagaqassagaluarunik allaffigineqassagaluarunillu politiinut unnerluussinissaq inassutigaa, angajoqqaallu meeqqanut alapernaanissaat kammatuutigalugu.
Meeqqat nakkutigineqarlik
- Redbarneminngaaniit meeqqat inuusuttullu mianersoqqussavagut Momo atassuteqarfigeqqunagu. Ajunngitsumik siunertaqanngilaq, killormulli ajortumik siunertaqartuulluni. Taamaammat angajoqqaat isumaginnittuusullu allat siunnersorpagut meerartatik inuusuttortatillu internetsertarnerini malinnaaffigeqqullugit, pingaartumik maannakkut momo illit meeqavit isumapilussaanik sunniiniartillugu, Meeqqat Ikiortigit siulittaasua, Jonna Ketwa KNR-mut taama oqarpoq.
Kalaallit Nunanni politiit erseqqissaatigaat momo pillugu nunatsinni unnerluutiginnittoqarnikuunngitsoq.
DR-ip meeqqanut isiginnaagassiaani ultrami momo pillugu ima saqqummiussaqarput:
