Franskit arsaattartut tusaamasat Nuummut tikissapput
Nuummi unnugu siullermik arsaatissapput ilaatigut Michel Platini, Didier Deschamps, Christian Karembeu, Arsene Wenger taanna Arsenalip sungiusaasorisimasaa aamma tennissertartoq Yannick Noah. Taakku arsaannerni tamani peqataaneq ajortut ilagissavaat franskit nunanut allanut unammisartorisimasaat tusaamasaq, Robert Pires, taanna Tuluit Nunanni Arsinal-imi arsaattartuusimasoq.
Robert Pires 79-eriarluni franskit nunanut allanut arsaanneranni peqataasareerpoq, 1998-imilu nunarsusaq tamakkerlugu unammersuarnermi pissartanngoqataalluni taamatullu 2000-imi Frankrig Europami pissartanngormat arsaateqataalluni.
Nunatsinni arsaattartut utoqqasaanngorsimasut tusaamaneqarnerillu, Frankrig-imut unnugu nalunaaqutaq arfineq marlup qeqqanut arsaatissapput. Nunatsinniit kikkorpiaat ilaassanersut suli iluamik paasineqanngikkaluartoq, taamaattoq ilaatigut Michael Binzer, Finn Karlsen aamma Aqqaluaq B. Egede arsaateqataassasut, Nunatsinni arsaattartut kattuffianni siulittaasup, John Thorsenip oqaatigaa.
Franskit arsaattartut umiatsiamik Nuup kangerlaunut aqagu angallanneqassapput. Pingasunngorpat Nuuk Centerimiissapput nalunaaqutaq ualikkut marluniit, takuniaasunut atsiornernillu nuannarisaqartunut atsioqattaassallutik. Tamatuma kingorna unnukkut nalunaaqutaq arfinermut arsaateqqissapput Nuummiut utoqqasaartaannut unammissallutik.
- Varétés Club de France-mi arsaattartut Nunatsinnut tikinneri nuannaarutissaavoq annertooq, John Thorsen oqarpoq imalu nangilluni.
- Arsaannissaat pissanganarluarpoq ilimanarporlu isiginnaariaqarluarumaartoq, John Thorsen oqarpoq.
Arsaannerit tamarmik Nuup arsaattarfiani silamiittumi pissapput, silali ajussagaluarpat arsaannerit tamarmik Inussivimmi pissasut nalunaarutigineqarluni.
