Frankrigimi paarnaarussaq aappassaat qimaasoq
Frankrigimi oqartussat naapertorlugit 46-nik ukiulik Redoine Faid qulimiguulimmik ikiorneqarluni minutsialuit ingerlanerinnaani qimaasimavoq.
Angutit pingasut aallaaserlutik paarnaarussivimmukarsimapput Faidilu aninguiseqqullugu piumasaralugu, nutaarsiassaqartitsivik Reuters taama allappoq.
Taamaaliornerli allamut saasaataaginnarsimavoq, qulimiguuliup paarnaarussiviup aneersuartarfianut minniassammat.
Angutit aallaasillit Faud pulaartarfigineqartartumiittoq qulimiguulimmukaateriarlugu aallaruppaat, taamaaliortoqarneranilu ajoqusertoqarsimanngilaq.
Kingorna qulimiguulik ikuallassimasoq Parisip avannaatungaani nassaarineqarpoq, pilotilu tigusarineqarsimasoq pasineqarpoq.
- Qimaasut ujaarineqarnissaannut suut tamarmik piareersimapput, Frankrigimi indenrigsministerimi atorfilik oqarpoq.
Faid aallaasersorluni tillinniarsimasutut politiimillu arnamik 2010-mi toqutsisimasutut eqqartuunneqarnikuuvoq.
Faud aappassaa tupannartumik paarnaarussivimmit qimaavoq, 2013-imi siullermik paarnaarussivimmi nakkutilliisut sisamat tigusareriarlugit paarnaarussiviup igaa qaartissinnarlugu qimaanikuuvoq. Sapaatip akunnerili arfinillit qaangiuttut politiinit tigusarineqaqqinnikuulluni.