FRAM sikoqarpallaarunnaarneratigut Qasigiannguanut tikissinnaalerpoq
-Qasiannguit umiarsuanik takornariartaatinik tikinneqarnissaa pilersaarutigineqanngilaq - ukiunili kingullerni paasivarput piareersimaffigalutigullu - umiarsuit takornariartat piffissamik killilimmik kalerriinikkut umiarsuit takornariartaatit tikittarnerat. Qasigiannguani takornariartitsinermut peqatigiiffiup ataani illoqarfimmi peqatigiiffiit sullissiviillu suleqatigalugit tamanna piareersaateqarfigereersimavarput - ukiarli sammisassanut pilersaarusioreerpugut, katersugaasiviup pisortaa Anne Mette Olsvig, aamma illoqarfimmi takornariartitsinermut peqatigiiffimmut ilaasortaasup oqaatigaa.
Tikittoqarnissaata nalunaarutigineqarneranit akunnerit marlussuit qaangiummata quppersagaq paasissutissanik pilersaarutinillu imaqartoq FRAM-ip angallassisuinut ilaasuinullu e-mailikkut nassiunneqarpoq.
Qasigiannguani aaqqissuisut ukiormanna illoqarfimmi meeqqerivimmeersut umiarsualivimmi tikilluaqqusinissaannik aaqqissuussisimapput, tikeraallumi meeqqallu nuannisavissorput.
Illoqarfimmi pilersaarutitut ilaatigut ilagaat Hotel Diskobayimi kalattoorneq, Arnat illuannut pulaarneq, qimmeqarneq pillugu paasissutissiineq, illoqarfimmi illumi issunik qarmakkamut pulaarneq kaffimik tiimik kaaginillu pillertoqarluni, aamma Qasigiannguit katersugaasivianni saqqummersitsisoqarpoq, ilaatigut qassutinik puisinniutinik ningittakkanillu suliaqarneq takutinneqarluni, aammattaaq issittormiut qilaataata kiinarpaallu atorlugit nutaaliaasumik aaqqissuussisoqarpoq.
Suliniut asimioqarfik uummaarissoq, sullivittaata illutaa nutarterneqartoq, katersugaasiviup ataani umiarsualiviup eqqaani suliniutip ukiuunerani piareersaataanik allani saqqummersitsiviuvoq, ilaatigut umiap upernaamut piareersarneqarluni.
Tikeraartoqarneq erinarsoqatigiit QE-83-p Paaviap Oqaluffiani erinarsornerannik nalliuttorsiorpalaartumik naggaserneqarpoq.
-Ulloq nuannavissortumik atorparput - aamma FRAM-ip ilaasui angallassisuilu taamatut misigisimanissaat qularinngilarput. Naliliinissaannik noqqaavugut, aammalu neqeroorutitta naleqqussarnissaannut ineriartorteqqinnissaannullu piareersimavugut, siunissamilu umiarsuit takornariartaatit mikinerit aalajangersimasumik tikittalernissaat neriuutigalutigu, Frank Larsen Qasiannguani takornariartitsisartut peqatigiiffianneersoq naggasiivoq.
