Kangilinnguani illuutit mingutsitsineq pissutigalugu isaterneqartariaqartut
Danskit illersornissaqarfiata Kangilinnguani illuutigisimasai kingusinnerpaamik aappaagu maajip aallaqqaataani piiarneqarlutik aallartinneqassapput.
Namminersorlutik Oqartussat Kommuneqarfik Sermersoorlu taamatut isumaqatigiissuteqarfigineqarsimasut, Illersornissaqarfiup Danmarkimi illuutaanut pisortaq Claus Uttrup taama oqaluttuarpoq.
- Illersornissaqarfimmut piumasaqaataasut tassaapput qimalerutsigu salilluaqqaarnissaa. Tassunga ilaallutik mingutsitsinerit piiarneri, illuutit, sanaartukkat, aqquserngit umiarsualivillu piiarneqassallutik.
Illuutilli piiarneqarnissaat arlalinnit isornartorsiorneqarsimapput, isornartorsiuisut kissaatigisimavaat illuutit ilisimatusarnermut, takornariartitsivittut naatitsiviliarineqarlutilluunniit atorneqarsinnaasut, taamaaliornissarli ajornaatsuinnaanngittoq Claus Uttrup KNR-imut oqarpoq.
Aamma atuaruk Schweizimiut Kangilinnguani nunalerinermik ilinniarfimmik suli pilersitserusuttut
Illut toqqaviini mingutsitsisoqarsimasoq
- Illut ilaasa toqqaviini mingutitsisoqarsimasoq paasineqarsimavoq. Avatangiisinillu iluamik saliissagutta tamakku piiaqqaartariaqarput.
Tamatuma saniatigut Illersornissaqarfik illuutinik ingutserinngikkuni aningaasatigut eqqornerlunneqarsinnavoq.
Aamma atuaruk Kangilinnguit takornariarfinngortinnissaat ilimanarpallaanngitsoq
Akisuallaassaaq
- Taava Illersornissaqarfiup illuutit piiaarumallugit maskiinat sulisussallu Kangilinnguanukaassortariaqassavai.
Inatsisittaaq peqqutaaqataapput sakkutooqarfiusimasoq tamaat pinngoqqaarneratut isikkoqartillugu qimanneqartariaqarmat, Claus Uttrup oqarpoq.
- Illuutit allanut tunniunnissaat ajorinngilarput. Kangilinnguilli allatut atorneqalissappata, mingutitsisoqarpallu kikkut mingutitsisuunerisa uppernarsarnissaa ajornartorujussuussasoq.
Illuutit ingutserneqarnissaannik isornartorsiuisut tassaapput sanaartugassanik ilusilersuisartoq Peter Barfod Nuuk, schweizimiullu suliniaqatigiiffiat 3HF, taakku illuutit piiarneqarnissaat isornartorsiorsimavaat isumaqaramik takornarianut, ilisimatusarnernut naatitsivittulluunniit atorneqarsinnaasut.
Aamma atuaruk Kangilinnguit takornariarfinngortinnissaannut Illersornissaqarfik apeqqutaassaaq
