Kinamiut ilisimatuutut misissuiffissaat periarfissanik ammaassivoq

Taamaattumik Kinap maani ilisimatuutut misissuiffiliornissamik soqutiginninninera ajunngitsuusoq, suliffeqarfinnik Kinamut tunisassiorusuttunik siunnersuisartoq isumaqarpoq.

- Imaassinnaavoq ikinngutigiinneq pilersinneqarsinnaasoq, Minik Høegh-Dam oqarpoq.

Issittumut Kina annertuumik soqutiginnereerpoq; Shanghaimi issittoq pillugu ilisimatusarfeqarpoq, aammalu Islandimi Svalbardimilu taama ittuuteqarluni.

Taamaattumik taanna aamma isumaqarpoq Kalaallit Nunaata kinamiut maaniinniinnissaminnut periarfissaat nuaannarutigiinnartariaqaraat.

- Isumaqarpunga maaniittut ilaatigut Kalaallit Nunaat niuveqatigerusullugu, attaveqarfigilerusullugu ikinngutigilerusullugulu.

AAMMA ATUARUK Kinamiut nunatsinni misissuiffimmik pilersitserusuttut

Illersornissaqarfimmi adjunktip KNR-imut erseqqissaatigaa Kina aamma aningaasarsiorneq eqqarsaatigalugu Issittumiittumik soqutiginnittoq.

Minik Høegh-Damip ilisimanerarpaa nunat akornanni ikinngutigiinnissaq kisimi pineqanngitsoq, Kinami aamma pinngortitami isumalluutinut soqutiginnippoq Issittullu sikuerukkiartornera iluatsillugu Europamut USA-mullu immaatigut periarfissap atorluarnissaa.

Minimmulli eqqarsaataavoq kinamiut Issittumiilernissaat Kalaallit Nunaata atorluaasinnaagaa.

- Nunarsuaq tamaat niuverfigaat, taamaattumik niuveqatigilissagutsigit nammineq qanoq silatusaartigissanerluta aalajangissavarput, suliffeqarfinnik Kinamut tunisassiorusuttunik siunnersuisartoq Minik Høegh-Dam oqarpoq.

AAMMA ATUARUK Ilisimatusarneq pitsaasumik attaveqalernissamut aqqutissaavoq