Ilisimatusarneq pitsaasumik attaveqalernissamut aqqutissaavoq
Danmarkimi illersornissaqarfiup ilinniarfiani, Forsvarsakademimi, adjunkti taama oqarpoq, Issittullu Kinamut pingaaruteqartupilussuunera aamma naqissuserpaa.
- Kinamiut angusorutaat tassaavoq issittumi naalagaaffinnut pitsaasumik attaveqalernissaq qulakkiissallugu, Camilla Sørensen Københavnimi Forsvarsakademimeersoq Kinallu nunanut allanut sillimaniarnermullu politikkianik ukiorpassuarni ilisimatusartoq taama oqarpoq.
Kinap Issittumi soqutigisai ukiuni kingulliunerusuni sammivai, oqaluttuarporlu silarsuarmi nunat inuttunersaat Issittumiinnissaminut arlalinnik pissutissaqartoq.
AAMMA ATUARUK Kinamiut nunatsinni misissuiffimmik pilersitserusuttut
Kina arlalinnik soqutigisaqarpoq
Nukissiuutit pinngortitallu pisuuussutaasa saniatigut Issittup sikueriartuinnarneratigut Europamut silarsuullu sinneranut imaatigut aqqutit sivikillinissaannut periarfissat Kinap aamma soqutigai.
Ilisimatuutullu misissuiviliornikkut science diplomacymik taaneqartartoq Kinap atorpaa, tassalu ilisimatusarneq aqqutigalugu issittumi nunanut pitsaasumik attaveqalernissani anguniarlugu.
- Kinap issittumilu naalagaaffiit akornanni tatigeqatigiinneq annertusiartortissavaat, taamaaliornikkullu naalagaaffiit taakku ilaasa Kinap nunaminniilernera issittumullu nalinginnaasumik soqutigisaqarnera ernumanartoqartippallaarunnaassavaat, Camilla Sørensen taama oqarpoq, nunallu allat nunanut allanut attaveqarnerminni aamma taamatut periaaseqartartut erseqqissaatigalugu.
Issittumi Siunnersuisoqatigiinni alaatsinaattuusoq
Kinap aamma takusinnaavaa Issittoq nunani tamalaani politikkikkut pingaaruteqaleriartuinnartoq, pingaarutilinnillu aalajangiisoqassatillugu taakku aamma peqataaffigerusuppai.
- Tamannalu pissutigalugu Issittumi Siunnersuisoqatigiinnut 2013-imili alaatsinaattutut peqataaffigisaminut ilaasortanngornissani piffissami sivisuumi qinnuteqaatigaa.
Kinap nunatsinni pinngortitami pisuussutit ilai soqutigisinnaagaluarai, Camilla Sørensenip Forsvarsakademiimeersup tamanna Kinap nunatsinni ilisimatuutut misissuiviliorusunneranut pissutaanngitsoq qularutiginngilaa.
- Isumaqarpunga Kinap Issittumi susassaqartunut tamanut pitsaasumik patajaatsumillu attaveqalernissaminik pilersaateqarneranut tunngassuteqarnerusoq,))) Camilla Sørensen Københavnimi Forsvarsakademimeersoq taama oqarpoq.
