Naalakkersuisoq: Nunami allamiut ilisimatusarnerat Nunatsinnut iluaqutaassaaq

Ilisimatusartut politikerillu nunatsinneersut, USA-meersut Danmarkimeersullu, ilisimatusarneq pillugu Washingtonimi ataatsimeersualeruttorput, suleqatigiinnerunissarlu tassani pingaarnertut oqallisaavoq.

Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger (S) Washingtonimi ataatsimeersuarnermi peqataavoq, tassanilu aamma oqalugiartunut ilaalluni.

- Ilisimatusartut amerlasuut nunarput tikeraartarpaat, amerlasuutigulli inuiaqatigiinnut ungasittarlutik. Suliat tamakku inuiaqatigiinnut sunniuteqarnerunissaat kissaatigaarput.

- Taamaattumillu Kalaallit Nunaanni ilisimatusartut ataatsimoorfissaannik pilersitsinissaq sulissutigaarput, ataatsimoorfissaq ilisimatusartut inuiaqatigiillu naapittarfiattut inissisimassaaq, Ane Lone Bagger oqarpoq.

Wilson Centerimi oqallittoqarpoq, Kalaallit Nunaatalu Washingtonimi sinniisoqarfiata Wilson Center suleqatigalugu oqallinneq aaqqissuuppaa.

- Issittumi Kalaallit Nunaannilu ilisimatusarneq soorunami Kalaallit Nunaannut pingaaruteqarpoq. Taamaattumillu oqaaseqarninni nunarsuarmioqatigiit ilisimatusarnerup iluani suleqatigiissinnaanerata pingaaruteqassusaa, tassuuna ilisimatusarnerup Kalaallit Nunaannut inuiaqatigiinnullu suleqateqarnissaq pingaartillugu oqariartuutigaara, Ane Lone Bagger oqarpoq.