Danskit sakkutuuinik navinartorsiortitsisimasutut pisuutinneqartoq pineqaatissinneqanngitsoq
Nigeriamiu 40-nik ukiulik illuanik nioqanngitsoq ujajaasutut pasineqartoq danskit sakkutuuinut ulorianartorsiortitsisimasutut pisuutinneqarpoq, pineqaatissinneqassanngilarli.
Eqqartuussivik Københavns Byret taama aalajangiivoq.
Nigeriamiup angutip taassuma qaammatini aqqaneq marluk 15-illu akornanni parnaarussaanissaa ukiunilu aqqaneq marlunni Danmarkiliaqqussaajunnaarnissaa unnerluussisussaatitaasut piumasaraat.
Nigeriamiu angut taanna ukioq ataaseq parnaarussivimmi tigummigallagaavoq. Ippassarlu pineqaatissinneqareeraluarluni suli parnaarussivimmiissaaq.
Angutip Nigeriamiup parnaarussaanera decembarip 20-ata tungaanut sivitsorneqassasoq suliami eqqartuussisup aalajangerpaa, suliap ingerlateqqinneqarsinnaanera pillugu angutillu taassuma nunamit allamiuunera pillugu.
Angut taanna Nigeriap avataani ujajaaniat danskillu illersornissaqarfianeersut eqqaassinerisa kingorna 2021-mi novembarimi tigummigallarneqalerpoq.
Nigeriamiut ujajaaniat allat pingasut annapput, sisamaallu tassa Nigeriamiu angut taanna 40-nik ukiulik Danmarkimukaanneqarpoq.
Taanna ikilerneqarpoq niuatalu aappaa peerneqartariaqarsimalluni.
Taassuma iperagaanissaa illersorneqarsinnaasimanngilaq.
Suliamik eqqartuussisuuneqarfimmut ingerlatitseqqiinissamik sapaatit akunnerini marlunni eqqarsarnissaminut periarfissinneqartoq, ujajaasimasutut pasineqartup illersuisua, Jesper S Storm Thygesen, nalunaarpoq. Unnerluussisussaatitaasut aamma taama sivisutigusumik periarfissinnneqarput.