Atuakkiortup aataqqeeqqiimi tumai malikkai
Nannut sakkulersortartut, niaqqut saarngii eqqumiitsut arferup aatsarluataarsimanera puisillu pinngitsoorneqarsinnaanngitsut.
Meeqqanut atuakkiami nutaami inuttap Ottop naapitai ilaatigut taakkuupput.
Hanne Fabriciusip atuakkiaa "Kunngimut atuakkiaq" saqqummiunneqaqqammertoq kalaallisut qallunaatullu atuarneqarsinnaavoq.
- Kunngimut atuakkiaq nuannaarnermik aliasunnermillu imaqartinniarsaraara pissanganartuutinniarsaralugulu. Sapersittoqarpoq ingerlariaqqittoqarlunilu. Meeqqammi silatupput, misigisaqarusullutillu, Hanne Fabricius atuagaq pillugu oqarpoq.
Atuakkiortup aataavissuami ataataata Otto Fabriciusip misigisai isumassarsiorfigai. Taanna nunatsinni 1700-kkunni palasiuvoq, danskillu kunngiata nunatsinni uumasunik paasiniaaqqugamiuk uumasorsiuulluni.
Otto Fabriciusillu misissuinerminit atuagaq ”Fauna Groenlandica” 1780-imi saqqummiuppaa. Atuagarlu taanna Otto Fabriciusillu nunatsinni misigisai Hanne Fabriciusip atuakkiaanut aallaaviupput.
- Aasakkullu najukkaminit ukiuni marlunni angerlarsinnaasimannginnamik ukiuni marlunni tassaniittariaqarsimapput. Taamaalillutik pinngortitamik sivisuumik misissuinissaminnut periarfissaqarlutik, Hanne Fabricius siuaasami nunatsiinnera pillugu oqarpoq
Otto Fabricius nunatsinni ukiuni arfinilinni najugaqarpoq, ikinngutinilu Issittumi uumasunik 470-inik misissuillutik. Uumasuni taakkunani 130-t taamanimut ilisimaneqanngillat
Hans A. Lynge atuakkamik kalaallisut nutserisuuvoq.