Food Festival ingerlateqqinneqassaaq

-Food Festivali kalaallit nerisassaataasa pitsassuit najukkamilu nerisassiassanik atuinerup siuarsaanissap immikkut sammineqarnissaannik siunertaqarpoq. Innuttaasut, nunaqarfiit, savaateqarfiit, sullissiviit inuussutissarsiortullu annertuumik suleqataanerisigut Kalaallit Nunaanni Food Festivalit siullersaat aaqqissuussinernik pisoqartitsinernillu 40-nik 1500-1600-nit ornigarneqartunik aaqqissuussisoqarsinnaasimavoq, kommunimi inuussutissarsiornermut suliffeqarnermullu ataatsimiititami siulittaasoq Kalistat Lund naqissusiivoq.

Food Festivali siorna ingerlanneqartoq 200.000 kr.-nik missingersuuteqarfiuvoq, NIIP-millu (Nunap Immikkoortuinik Ineriartortitsiniarneq) tapersersugaalluni. Tugassiortut orniguttullu misigisatik alutorsaatigilluarpaat, pingaartumillu tamanna pissutigalugu Kommuni Kujalleq festivalip uteqqiattumik ukiumoortumik ileqquliunneqarnissaanik aalajangersimavoq.

-Festivali kissaatigisatsitut ingerlasimavoq, tassalu Kujataata tamarmi Food Festivaleralugu.  Food Festivali pillugu pitsaasuinnarnik apuussivigineqarpugut ingerlateqqinnissaanillu kaammattorneqarluta, taannami Kujataanik nittarsaaviuvoq kalaallillu nerisassaataannik atuinissamik siuarsaaviulluni. Taamaammat Food Festivalip nunap sinneranut siaruaannissaa kissaatigaarput, taamaattumillu nunap immikkoortui allat 2013-imi peqataanissaannut qaaqqorusuppagut,  Kalistat Lund oqaluttuarpoq.