Folketingimut qinigassanngortitat tamarmik saqqummiunneqanngillat
Atassummi allatsip qinigassanngortitat qaammatip tulliata ingerlanerani saqqummiunneqarnissaat oqaatigaa:
- Qinigassanngortitat akuerineqaqqaartussapput. Taamaattumik kikkut qinigassanngortinneqarnersut maannangaaq oqaatigisinnaanngilarput. Oqaatigiinnarsinnaavarali aggustip ingerlanerani saqqummiunneqarumaarmata, Hans Lyberth KNR-imut oqarpoq.
Kattusseqatigiit Partiiannit assingusumik aamma nalunaaruteqartoqarpoq:
- Kikkut qinigassanngortinnerlutigit oqaatigisinnaanngikkallarparput. Inuit sulinngiffeqarput, siulersuisuunerillu aamma suli ataatsimiinnikuunatik. Aggustip qiteqqunnerata missaani saqqummiussinnaassagunarpavut, Kaaleeraq Frederiksen, Kattusseqatigiit Partiianni allattoqarfimmeersoq oqarpoq.
Siumut, Demokraatit Inuit Ataqatigiillu qinigassanngortitatik saqqummiutereerpaat.
