Folketingimut ilaasortat Kujataani annaassiniartoqarneranik nalaataqartut

Folketingimut ilaasortat Kujataani ulluni makkunani paasisassarsiorlutik angalaleruttorput. Umiarsuarmilu alapernaarsuummi Knud Rasmussenimiinnerminni sisamanngormat unnukkut annaassiniartoqarnera malittaraat, Socialdemokraatineersoq Morten Bødskov Facebookimi taama allappoq.

- Frankrigimiut angallatimik motoorianik ajornartorsiuteqarlutik unnuaq ikioqqummata pilersaarutivut allanngortittariaqalerpagut.

Ikiuiartornerlu qujanartumik ingerlalluarpoq angallammilu inuttat umiarsuarmut alapernaarsuummut ikitinneqarput.

- Nalunaaquttap akunnerata aappaa avillugu ornippagut. Maanna kalippagut, immaqa Frankrigimi riviera taakkununnga naleqqunnerugaluarpoq, Morten Bødskov Facebookimi taama allappoq.

Folketingimut ilaasortat Kujataani sapaatit-akunneranni uani paasisassarsiorlutik angalapput. Nunaqarfiit, politiit, pinerluuteqarsimasunut inissiisarfiit, savaateqarfiit kommunalbestyrelsillu angalanerminni paasisassarsiorfigaat.

Umiarsuaq alapernaarsuut Knud Rasmussen ikiuukkiartortariaqarsimasoq Arktisk Komandop KNR-imut uppernarsarpaa.