Folketingimi ataatsimiinneq ullumi ammarneqarpoq.
Dronning Margrethe folketingip ataatsimiittarfianut apuuteqqammerpoq. Folketingimilu sivisunerpaamik ilaasortaasimasoq, Svend Auken qanittumi toqukkut qimaguppoq taannalu taarserlugu, Niels Helveg Petersenip Folketingip ataatsimiinnera ammassavaa.
Allattoq Jaaku Lyberth
oktobarip 06-at 2009 06:03
Folketingimi ataatsimiinnerup ammaanersiorneqarnerani Kalaallit Nunaat sinnerlugu ilaasortaatitap aappaa, Juliane Henningsen najuutissaaq, ilaasortaatitap aappaata Lars-Emil Johansenip napparsimalluni sulinngiffeqarnissaa pissutigalugu ataatsimeeqataassanngilaq.
Lars-Emil Johansenip napparsimalluni sulinngiffeqarnissaminik qinnuteqaataa Folketingip sisamanngorpat aalajangiiffigissavaa.
Sulinngiffeqarnissamik qinnuteqaat akuerineqarpat, Siumut sinnerlugu ilaasortaq, Doris Jakobsen Lars-Emil Johansen sulinngiffeqalerpat Folketingimi ataatsmeeqataalissaaq.
Ministeriuneq Lars Løkke Rasmussen Folketingip ammaanersiornermut atatillugu ullumi oqalugiassaaq.
