Folketingi coronavirusimik tunillatsittoqareersorlu matusoq
Politikerit nunatsinneersut Savalimmiuneersullu Folketingimi marlunngornermi apeqqarissaanngitsoorput.
Folketingimimi marlunngornermi oqallinnissaraluit taasinissaraluillu tamarmik, danskit ministeriunerannut marlunngornermi nalunaaqutaq ataatsip kingunitsianngua apeqqarissaarnissaraluaq sioqqullugu, taamaatinneqarput.
AAMMA ATUARUK Borgmesterip angerlarsimaannarnissaq pillugu qaammarsaasoqarnissaa kissaatigigaa
Folketingimi ilaasortani tallimanit ikinnerunngitsut coronavirusimik tunillanneqarsimasut paasineqareersorlu taamaatinneqarput. Det Konservative Folkepartip siuilittaasua Søren Pape Poulsen Venstremeersorlu Lars Christian Lilleholt tunillanneqarsimasutut paasineqartunut ilaapput.
Lars Christian Lilleholt COVID-19-imut puallunnermullu katsorsarneqarluni napparsimmavimmi uninngalluni Facebookikkut ilisimatitsivoq.
Tamatuma saniatigut ministerit folketingimilu ilaasortat aqqanillit angerlarsimaannaqquneqarlutillu coronavirusimut misissortinnerminnut akissutisinissaminnut utaqqipput. Danskit ministeriunerat Mette Frederiksen (S) inatsiseqarnermullu ministeriat Nick Hækkerup (S) taakkua ilagaat.
Politikerit nunatsinneersut angerlarsimaannaqquneqanngitsut
Inuit Ataqatigiinneersoq Aaja Chemnitz Larsen Mette Frederiksenimut apeqqarissaarnissaminut piareersimasimagaluarpoq.
Taanna isumaginninnermut tunngasuni kingullertigut isumaqatigiinniaqataasarpoq. Maleruagassat tamaasa naammassisarini, toqqissisimagaluarlunilu pisut malinnaaffigeqqissaarini, taanna KNR-imut aamma ilisimatitsivoq. IA-millu sulisut arlallit angerlarsimaffimminnit sulipput.
Siumumit Folketingimi ilaasortaq Aki-Matilda Høegh-Dam maanna Nuummiittoq, partip attaveqatigiinnermut akisussaasua Malik Milfeldt ilisimatitsivoq. Taamaammat Aki-Matilda Høegh-Dam danskit ministeriunerannut ullumi marlunngornermi apeqqarissaarnissaraluami peqataasinnaasimanngilaq.
Tamatuma saniatigut Siumut angerlarsimaffimmit sulisussamik atorfinitsitsisimavoq, sulisoreriigaalu allat marluk Christiansborgimut suliartortarlutik. Taakkuali Folketingip inoqatinut qanillinaveersaarnermut tunillannartuiaammillu atuinissamut maleruagassaanik naapertuipput.
Mette Frederiksenimut apeqqarissaarnissaq aqagu pingasunngornermut Danmarkip nalunaaqutaa malillugu nalunaaqutaq ataatsimut kinguartinneqarallarpoq.
Folketingip siulittaasoqarfianeersut qanoq iliornissaq oqallisigileruttorpaat.