Folkemødet kalaallit illuutaannut pingaaruteqarpoq
Taamaattumik innuttaasut tusagassiortut politikerillu Bornholmemi oqallillutik katerisimaarnerannut Folkemødemut Kalaallit illuutaat peqataajartoqqipput, tassani persuarsiornanngitsumik politikerinik naapitaqarsinnaagamik.
AAMMA ATUARUK Aaja Chemnitz Larsenip Erfalasorput Bornholmimi erfalatikkaa
- Isumaqatissarsiornermik taaneqarsinnaalluarpoq, isumaqatigiissuteqanngikkaluarluni sunniuteqarsinnaaneq pineqarpoq, Aarhusimi Kalaallit Illuanni pisortaq Jørn Holbech taama oqarpoq
- Oqallinnermi malugineqarsinnaavoq politikerit ilisimasaqalertarnerat aamma kalaallinut Danmarkimiittunut iluaqutaasunik, Aarhusimi Kalaallit Illuanni pisortaq taama oqarpoq
Danmarkimi Kalaallit Nunaannut tunngasunik ilisimasaqarpallaartannginneq Jørn Holbechip misigigajuttarpaa, taamaattorli innuttaasut politikerillu oqallillutik katerisimaarneranni kalaallinut soqutiginartut saqqummiunneqarnissaannut periarfissaqarluartoq, Jørn Holbech oqarpoq
AAMMA ATUARUK Kalaallit Illuutaat Folkemødetimi peqataasut
Politikerit tusagassiortut innutaasullu katerisimaarlutik oqallinneranni Folkemødetimi siorna Danmarkimi Kalaallit Illutaat nerivimmik nittarsaassiffeqarput, - ukiormannali taamaattoqannginnera peqataasunit uggornartinneqarpoq, taakkua kalaallit nunaanni inuiaqatigiit pillugit annertunerusumik paasisaqarusukkaluaramik, Jørn Holbech oqarpoq.
Jørn Holbech aappaagu Folkemødeqartoqarnissamut takkuteqqinnissani tunuarsimaarfiginngilaa.
-Namminersorlutik Oqartussat imaluunniit kalaallit folketingemut ilaasortaatitaat suleqatigilluta aappagu ataatsimoornissatsinnut periarfissaassaaq, Aarhusimi Kalaallit illuanni pisortaq Jørn Holbech oqarpoq.