Misissuinerit: Karrat Kangerluani qaqqap innartai sisooqqissinnaasut

Kalaallit Nunaanni Upalungaarsimanermut ataatsimiititaliap Karrat Kangerluanni qaqqap sisoorneranut sulilu aarlerinaateqarneranut upalungaarsimanikkut naliliinerit kingulliit saqqummiunneqarput

- Qaqqarlu sisooqqissagaluarpat Nuugaatsiaq Illorsuillu eqqorneqarsinnaasut.

Nuugaatsiarmiunut Illorsuarmiunullu Uummannami arfininngornermi ataatsimiisitsoqarpoq. Innuttaasunik ataatsimiititsinermi Naalakkersuisut Siulittaasuata Kalaallit Nunaanni Upalungaarsimanermut ataatsimiititaliap Karrat Kangerluanni qaqqap sisoorsinnaaneranut tunngatillugu naliliinera nutaaq saqqummiuppaa.

Namminersorlutik Oqartussat tusagassiuutinut taama nalunaaruteqarput.

Naliliinermili inerniliussaq innuttaasunut eqqungaasimasunut tusarluarnartoqarpallaanngilaq.

Karrat Kangerluanni qaqqaq ingerlaavartumik nakkutigineqarpoq, misissuinernilu uppernarsineqarpoq qaqqap sisoorsinnaanerata
aarlerinaateqarnera suli ”qaffasissorujussuusoq”. Sumiiffimmi aarlerinartoqartumi ilisimaneqareersumi qaqqap innartaanni qajannartortaasut
arlaqartut paasineqarmata.

Immikkummi ilisimasallit misissueriaatsit assigiinngitsut atorlugit misissuisimapput, qaqqallu sisooqqissinnaanera inerniliunneqarpoq:

AAMMA ATUARUK Uummannami malunnartitsineq tussunngunarlunilu eqqissinarpoq

Karrat Kangerluanni qaqqaq arlalinnik annertuunik sanngiinnersaqarpoq. Satellitsikkut paasissutissat nalunaarsukkat 2017-imi ukiuunerata ingerlanerani 2018-imilu upernaakkut pissarsiarineqartut atorlugit takuneqarsinnaavoq, qaqqap innartai arlallit suli nikikkiartuaartoqartut taakkunani ukiuunerata ingerlanerani aamma nikikkiartuaartoqarsimasoq. Taamaalilluni nutaanik qaqqap sisoorsinnaaneranut aarlerinaateqarnera suli qaffasissorujussuusoq nalilerneqarpoq.

Allannguutaasinnaasulli qaqugu pisinnaanersut immikkut ilisimasalinnit suli oqaatigiumaatsinneqarpoq.

- Qaqqap qaqugu sisooqqissinnaanera siulittuutigineqarsinnaanngilaq, naviannaatilittulli isigineqarpoq.

Taamaattumik Kalaallit Nunaanni Upalungaarsimanermut ataatsimiititaliaq naliliivoq, Nuugaatsiaq aamma Illorsuit, kangerloqarfillu inissisimaffigisaat navianartorsiorfiusutut suli isigineqartariaqartut, innuttaasullu Nuugaatsiamut Illorsuanullu navianartorsiorfiusuniissanngitsut.

AAMMA ATUARUK Qimagussortinneqarsimasut ajunaarnersuaqarnera puigunngilaat