Borgmesteri: Uummannami malunnartitsineq tussunngunarlunilu eqqissinarpoq

Borgmesterip Naalakkersuisut siulittaasuat, attaveqaqatigiinnermullu naalakkersuisoq Uummannameeqatigai.

- Aallaqqaammut misigissutsikkut assoroornarsinnarluni soorlu massakkut killiffik eqqarsaatigalugu eqqissinarlunilu ingerlariaqqinnissamut neriunnermik tunisivoq, Palle Jerimiassen oqarpoq. 

Malunnartitsinissaq sioqqullugu tassaarsuaqarneranit eqqugaasut nunaqqataasullu killiffik pillugu ippassaq ataatsimiinnermi nassuiaanneqarput.

- Innuttaasunik ataatsimiisitsineq ajunngitsumik ingerlavoq, killiffik pillugu paasissutissiivugut, aamma qaqqap allanngorani inissisimanera paasissutissiissutigivarput, Palle Jerimiassen oqarpoq. 

Akerliusoqarpoq paasinnittoqarlunilu
Nunaqarfinnik matoqqatitsigallarneq suli atuuttoq nalunaarutigineqarmat innuttaasut ilaannit akerlerineqaraluarpoq.

- Tamanna Illorsuarmiunit tupinnanngitsumik akueriumaatsinneqaraluarpoq, taakkuami nunaqarfigisaat  ajoquserneqarsimanngilaq, kisianni ulorianassusaa pillugu nassuiaasoqarpoq, massakkullu inissisimaneq allanngorsinnaanngikkallartoq tamannalu paasilluarneqarpoq, Avannaata Kommuniani borgmesteri oqarpoq.
 
Qimagussorneqarsimasummi inissinneqarnissaannut atatillugu sanaartornissat aallartittussanngorput:

- Uummannami nunaqarfiinilu illunik sanaartornissaq tullinnguuppoq, inissikkallarfissallu sananeqassapput, Palle Jerimiassen oqarpoq.  

Innuttaasut qimagussorneqarsimasut inissaqarnissaat aaqqiissuteqarfiginiarlugu ataqatigiissaarisumik aggustsip aallaqqaataanit atorfinitsitsisoqassaaq.