Finn Lyngemik eqqaaniaaneq
- Nunaqqatigiilluta oqaluttuarisaanitsinnut annertuumik sunniuteqarsimasumik, anersaakkut inuiattullu nukittunerulersitsisimasumik, minnerunngitsumillu inuiaqatigiittut immitsinnut piumaffiginerusinnaanitsinnut apeqqusiisinnaanitsinnullu annertuumik sunniuteqarsimasumik annaasaqarpugut, Aleqa Hammond allappoq, imatullu nangilluni:
- Finn Lynge, Nunatsinni tamanit annerungaartumik kalaallit piniartortatta atugaat nunarsuarmioqatitsinnit, soorlu Naalagaaffiit Peqatigiit, EF-iusimasumit, Nunarsuaq Tamakkerlugu Pinngortitap Piujuaannartinneqarnissaanut Kattuffimmit Nunarsuarmi Arfanniartarneq pillugu Ataatsimiititaliarsuaq aqqutigalugit paaseqqullugit illersorlugillu assoroorsimavoq, paasitikkumallugit inuuniarnitsinni atukkatta allamiunut sanillersuunneqarsinnaanngissusaannik aammalu nungusaataanngitsumik tunngaveqartumik ingerlatsinitsinnik paasisimasaqaqqullugit. Nunatta nunanut allanut politikkia Finnimit annertuumik tunaartalerneqarpoq, malunnaateqarluartumik, Naalakkersuisut siulittaasuat Aleqa Hammond, Finn Lyngemik eqqaaniaanermi ilaatigut allappoq.
Finn Lyngep tunniusimalluni sulisarnera, Kommune Kujallermi borgmesterip eqqaamaniarpaa:
- Finnip suliat soqutigisani tamatigut pimoorulluinnartarpai. Isummani oqaatigiuaannarpaa apeqqutaatissanagulu kina oqaluunnerini. Siunnersoqqugaanni susaarfiunngisaannarpoq. Inuk immikkuullarilluinnartoq. Ilisimasaqarpassuaqarpoq oqaatsillu assigiinngitsorpassuit atorsinnaallugit. Atuakkiai soqutiginartuaannarput paatsuugassaajunnaarlugillu allagaasimasarlutik, Kommune Kujallermi borgmesteri Jørgen Wæver Johansen, Finn Lyngemik eqqaanialluni ilaatigut allappoq.
Nunatta nutaajusup ilisarnaataasa ersarissut ilaat. Inuit Issittormiut Siunnersuisoqatigiiffiata, ICC-p, præsidentiata Aqqaluk Lyngep, Finn Lynge taama ilaatigut eqqaaniarpaa:
- Oqaaseq "nunarsuarmioqataaneq" suli nalugallaratsigu Finn Lynge taamaattuuvoq. Finn Lynge ullaaq toqukkut qimaguttoq 80-inik ukioqarluni, tassaavoq Nunatta nutaajusup ilisarnaataasa ersarissut ilaat. Qallunaamik anaanaqarami kalaallimillu ataataqarluni, ullutsinni taamaattorpassuit allat peqatigalugit kalaallisullu qallunaatullu naligiimmik kinaassuseqarpoq. Taamaakkami nunarsuarmiunut allanut akuulerpoq nagguini nakooqqutigalugit, ICC-p Kalaallit Nunaanni præsidentia Aqqaluk Lynge allappoq, nangillunilu:
- EU-parlamentimi ilaasortatut, Udenrigsministereqarfimmi siunnersortitut aammalu ICC-p avatangiisit pillugit allattoqarfianik ataatsimiititaliaanillu siuttuunermini 1985-imiit 1987-imut nunat inoqqaavisa piniarsinnaatitaanerat aalisarsinnaatitaaneratalu immikkut illersorneqarnissaat nunarsuarmi aalajangiisartuni akueritinniarsimavaa. Ullumikkullu nungusaataanngitsumik pisuussutinik atuineq tassaalersimavoq Issittumi nunat tamarmik aqutsinerminni najoqqutariniarsarisaat, ICC-p Kalaallit Nunaanni præsidentia Aqqaluk Lynge, Finn Lyngemik eqqaaniaalluni ilaatigut allappoq.
