Finn Lynge Ilimmarfimmi ataqqinaammik doktorinngortinneqarpoq
Saqqummiussilluni oqalungiarami lektor dr. phil. Thorkild Kjærgaard oqarpoq, Finn Lynge Kalaallit Nunaata inuunerata iluani avataanilu ukiut 20. århundrede-kkunni inuit nuimanerpaat ilagigaat.
-Malunnaateqaannarumanngilaq. Qutsinnerusumulli akulerukkusuppoq. Angorusussimavaa oqaluttuarisaanerup allanneqarfigiinnanngisaa, angorusussimavaa oqaluttuarisaanerup pilerfia. Angullugulumi, Thorkild Kjærgaard oqarpoq.
Ukiorpassuit nunani allaneereerluni Finn Lynge Nunatsinnut 1963-imi angerlarpoq katuullit palasiattut, isumaginninnerullu iluani suliartorluni. 1974-imi KNR-mut pisortanngorpoq, 1979-imi Kalaallinit siullersaalluni Europaparlamentimi ilaasortanngornissani tikillugu - tassaniippoq 1984-imi Nunatta EF-miit aninissaa tikillugu.
Parlamente-meereerami Københavnimi nunanut allanut ministereqarfimmi Kalaallit Nunaannut tungasunut siunnersortinngorpoq. Nunatsinnut suliarpassuisa ilaat naggaserneqarpoq namminersorneq pillugu ataatsimiititaliarsuarmiinnerani, suliap taassuma inerneraa Namminersorneq Pillugu Inatsisip juunip 12-ianni 2009-mi atuutsinneqalernera.
Finn Lynge Ilisimatusarfiup æresdoktorinngortittagaanni sisamaavoq. Siusinnerusukkut professori soraarneq Robert Petersen, Michael Hauser aamma Henrik Wilhjelm.
Ullumikkut Ilisimatusarfiup nalliuttorsiorneranut peqataapput Namminersorlutik Oartussaneersut, Kommuneqarfik Sermersuumeersut, sulisitsisut suleqataasartullu assigiinngitsut.