Kalaallit filmiliornermik piginnaasallit pissarsiariniarneqarput
Filmiliornermik soqutiginnittut pikkorissartinneqarnissaat pissaaq Nuummi, oktobarip 20-aniit 22-at ilanngullugu sammisaqartinneqassallutik. Tamassuminnga aaqqissuisuullutik filimiortartut peqatigiiffiat, FILM.GL.
Sammisaqartitsinermi anguniarneqarpoq, Nunatsinni filmilornermik nuannarisaqartut pikkornnerulernissaat aamma suliniutiminnik sukkanerusumik naammassisaqarnissaat.
- Sammisaqartitsinermi siunertarineqarpoq filmiliorniarnermi aningaasanik ujarlernissaq aamma filmip qanoq oqaluttuarinissaa qanrlu naammassineqarsinnaanersoq ilinniarneqarsinnaallutik, Nunatsinni filmiliortartut peqatigiiffianni siulittaasoq, Pipaluk K. Jørgensen oqarpoq.
Filmimik nuannarisaqartut sammisaqartinneqarnissaannut atatillugu peqataarusuttut ujartorneqarput. Taakkulu sammisaqartinneqarneranni, Nunani Avannarlerni filmiliortartut pingasut ilistersuisuussapput.
Aamma atuaruk Filmi Pituffimmi ajutoornermut tunngasoq upernaaru takuteqqaarneqassaaq
Ilaatigut ilitsersuisuussalluni filmimik 'Idealisten'-mut ilitsersuisuusoq, Christina Rosendahl. Filmi 'Idealisten' Nuummi upernaaq takuteqqaarneqarpoq, Thulemi amerikamiut sakkutooqarfiata eqqaanut timmisartorsuup B-52-ip nakkarneranut tunngasuulluni.
Aamma sammisaqartitsienrmi ilitsersuisuussaaq svenskeq filmiliortartoq, Helene Granqvist taamatullu danskeq naatsunik filmiliortartutut tusaamasaasoq, Prami Larsen.
Sammisaqartitsinermut peqataarusukkaanni oktobarip aallaqqaataa nallertinnagu qinnuteqartoqarsinnaavoq.
Sammisaqartitsineq taaguuteqarpoq, 'TAKE ONE', tassalu tamanna ingerlanneqassalluni, oktobarip 20-aniit 22-at ilanngullugu.
