Filmiliarsuaq Katuami takutinneqaqqaassaaq
Filmi pissanganartuliaavoq Oscarinnannikumit Tomas Villum Jensenimit ilitsersorneqartoq, Nikkulaannillu marlunnit inuttaaffigineqartoq. Nikolaj Lie Kaas aamma Nikolaj Coster-Waldau filmip Katuami takuteqqaarneqarnerani nuliatik peqatigalugit Nuummiissapput. Filmip nunatsinni takuteqqaarneqarnera Danmarkimi takutinneraniit qaammammik ataatsimik siusinnerussaaq.
Filmi nunarsuup illuatungaani Australiap inoqajuitsortaani orpippassuarni pisimasuutinneqarpoq, filmimi naasoq qaqortumik sikkersartoq qaqutigoorluinnartoq, naassaanngitsumik inuuneqalersitsisartuuneragaq akersuunnermik pilersitsisoq pineqarpoq. Filmimi naasoq piinnarlugu Indonesiamiut sakkutuui amerikamilu peqqarniisaarniartartut gangsterit akersuuttunut ilaapput.
Filmi "Ved verdens ende" Danmarkimi oktobarip ulluisa qulingiluaanni takuteqqaarneqassaaq, Nuummili tassa septembarip ulluisa tallimaanni takuneqarsinnaassalluni. Ullormi takutinneqarfiani Katuaq nalliuttorsiualaartitsissasoq aamma ilimasaarutigineqarpoq.
