Filmi Inuk nersorneqarpoq
- Assilineri kusanarlutillu killorluagaaqaat, filminik ilisimasalik Erik Gant IPS-imi pisortaq Arctic Council Indigenous-ip allattoqarfiani oqarpoq. Isiginnaartitseqataasut sungiussisimanngikkaluartut aamma nersualaarpai.
- Silaannaap allanngoriartornerata inuillu kulturiat inuusaatsikkut unammilligassanut, sumiginnaanermut imigassamillu atornerluinermut ilanngutitippai taamaannerami inuiaqatigiit issittumiittut pillugit oqaluttuaq ilumoortuummat, Erik Gant allappoq.
Filmip piviusunik tunngaveqartup Inuk 16-inik ukioqartoq oqaluttuaraa, taanna anaanaminit imerajuttumit angutisiaminillu annersaasartumit arsaarinnissutigineqarpoq Uummannamilu meeqqat angerlarsimaffiannut inissinneqarluni. Piniartoq Ikuma tassani naapippaa piniariaqatigalugulu.
Inuk 2008-mi immiussaavoq. Inuiaqatigiit pissusaannik ilisimasalimmit Jean-Michel Huctin-imit Mike Magidson-imillu allagaavoq, kingulliullu aamma ilitsersuussiffigivaa. Gaaba Petersen (Inuk) aamma Ole Jørgen Hammeken (Ikuma) pingaarnertut inuttaapput inuttaasullu ilagaat inuusuttut, soorlu Sara Lyberth, Pipaluk Hammeken aamma Jens Zeeb.
Isiginnaartitsisut immiussinermi torrutiinnarlugu isiginnaartitsisarput. Soorlu Inuk, Gaaba Petersen, perngartinneqarmat Gaaba Inuttulli perngarpoq nuannaarneralu ilumoortoq filmimi takuneqarsinnaalluni.
Filmip ilaani allami Inuk issittumi atisani sissorlugit imminooriaraluarpoq. Taamaaliornissaa oqaluttuami malitassamiinngikkaluarpoq immiussinerulli nalaani Gaaba Petersen-ip atukkani pillugit erloqiummernini taamaalillugu takutippaa. Takutitarlu ilumoorpalaangaarmat tupinnarluinnarpoq, assiliisartoq atuakkiortorlu Bill Hess allaaserisamini allappoq filmilu nersorluinnarlugu.
Filmi ICC-p ataatsimeersuartitsinerata nalaani Inuit-filmfestivalimi junip naalernerani takuteqqaarneqarpoq.
Kalaallit tusagassiortunngorniat ICC-p ataatsimeersuartitsinerata nalaani tusagassiisartuusut filmi qilaateeqqanik tallimanik nalilerpaat, pitsaanerpaaq qilaatinik arfinilinnik nalilerneqartarpoq.
Filmi Inuk USA-mi Frankrigimilu tunineqarsinnaajumaartoq filmiliortut neriupput.
