Filmertitsinerit iluatsillualerunarput

Ukiormanna filmertitsisaqattaarnerit aatsaat taama iluatsilluartigaat, ullut filmertitsiffiusut Atlantikup avannaamiut illuanni ukiut arfinillit matuma siorna ingerlanneqartalermatali. Aaqqissuisoq Birgir Thor Møller oqarpoq.

Atlantikup Avannaamiut illuanni billetit 840-ut tunineqareerput maannalu tassa nungulerlutik.. Filmi "Qaqqat alanngui" ima alutorineqartigaaq pingasoriarluni takutinneqartussanngorluni. Aamma kalaallit franskillu filmiliaat "Inuk" billetit nunguttarlugit sapaatit akunneri arlallit takutinneqartarpoq. Taakku saniatigut takutinneqarput tusaamaneqarluartut "S.O.S. Eisberg" aamma Peter Freuchenip filmiliaa "Eskimo" taakkulu ilimagisamit alutorineqarnerupput.

- Kalaallit Nunaat sammineqaleraangat soqutiginnittoqartaqaaq. Taavanimi filmiliarineqartartut ikittuinnaammata, ukulu filmit takutitassavut pissanganarlutillu nuannersuupput, asulu filminik festivaleqarnerni arlalinni akissarsitinneqartarsimagillutik. Tassa filmit taakku inunnit tusaamaneqareeraluarput, takuneqarsinnaasimanatilli. Taamaammat takuneqarnissaannut periarfissaqalerniariartoq inuit ussattunnguupput. Birgir Thor Møller oqarpoq nangillunilu:

- Kalaallit Nunaat inuisalu kulturiat pillugit filmiliortoqarnialeraangat, inuiaat allat avataanit tikillutik, ukiuni 100-ni filmiliortarsimapput. Filminili ukiuni kingullerni saqqummertalersuni kinguaariit nutaat inuunerat sammineqartalerpoq, taakkorpiaammi takussallugit maqaasiuarsimavavut. Ilami filmit ukiuni 100-ni takusartakkavut makkuinnavissuusimapput: Angutip kiserliortup pinngortitarsuarmut akersuunnera imaluunniit inuttut atugassarititaasunut inuup ataatsip ilungersuuteqarnera. Taamaammat nutaaliornerit qujaruttupilussuuavut.

Martin Mörckip, Mikisoq Lyngellu filmiliaat 'Nordafar' ullumi takutinneqaqqaartussaagaluarpoq. Filmi Nordafar seqertitsiviit pingasut atorlugit isiginnaagassiaavoq, aalisakkeriviusimasullu 'Nordafar'-ip Nuup kujataatungaaniittup ukioq kaajallallugu filmiliarineqarnera malinnaavigineqarsinnaalluni. Filmili, filmiliortualu nunatsinni silarlussiorlutik ingerlariaqqissinnaajunaaqqagallarmata, filmip takuteqqaarneqarnissaa arfininngorpamut kinguartinneqarpoq.