Filippinerini nuna illoqarfissuup eqqaaniittoq sajuttoq
Qeqertami Mindanaomi Filippinerit kujasissortaanni inissisimasumi nunap ullumi marlunngornermi sajunnera Richterskalamik uuttorlugu 6,6-iuvoq.
USA-p ujarassiortuisa nakkutilliisoqarfiat (USGS) taama ilisimatitsivoq.
Nukappiaraq 15-inik ukiulik Magsaysaymi atuarfimmiitilluni qammarsuarmit eqqorneqarluni ajunaarpoq. Atuartut allat atuarfimmit aniguiniartillutik aamma aqqunartitersimapput, annallutilli. Illoqarfimmi aqutsisut sinnerlugit oqaaseqartartoq nutaarsiassaqartitsivimmut AFP-mut taama tusarliivoq.
Nuna sajuttoq illoqarfissuarmit Davaomit - tassa Filippinerini illoqarfissuit anginersaat pingajuannit 1,6 milliuuninillu inuttaqartumit - 60 kilomiiteringajannik ungasitsigisumiippoq.
USA-p ujarassuiortuisa nakkutilliisoqarfiata (USGS) tusarliussaa naapertorlugu nuna ullaakkut qulingiluat qaangilaaraa sajuppoq.
Tulunanimi innuttaasut allaffeqarfinnit, atuarfinnit napparsimmavinniillu anillutik qimaapallattut nunap sajunnerani videoliani attaveqaqatigiittarfinni saqqummiunneqarsimasuni takuneqarsinnaapput.
Filippinerini oqartussaasut naapertorlugit nunap sajuffia illoqarfimmit Tulunanimit 25 kilometeringajannik ungasitsigisumiippoq.
Tulunanimi borgmesteri, Reuel Limbungang, teknikerit atuarfinni aseruatitersimasuni misissuiniassammata atuarfinni atuartitsinerit unitsikkallarneqarnissaannut naalakkiisimasoq nutaarsiassaqartitsivik dpa allaaserisaqarpoq.
Sumiiffiit ilaanni nunap sajunnera minutsip ataatsip missaani sivisussuseqarsimavoq, tamannalu illut, inissiarsuit quleriinnik initallit atuarfiillu aseruatiternerannik kinguneqarpoq.
- Illut sajuinnaratik erfalasuusipput. Guuti kutsiorfigaara, Tulunanip napparsimmaviani nakorsaq, Gadi Sorilla, nutaarsiassaqartitsivimmut AFP-imut oqarpoq.
Ilanngullugu oqaatigaa, nunap sajoreernerata kingunitsiannguagut inuit aqqunarsimasut qulit missaat napparsimmaviliaanneqarsimasut.
Filippinerini nuna ullumi marlunngornermi sajuffiusoq sapaatit akunnerit marlungajaat matuma siorna Richterskalamik uuttorlugu 6,3-mik sajummat inuit arfineq-marluk ajunaarput.
Tamanna nunap sisoorneranik pisiniarfissuullu ikuallanneranik kinguneqarpoq.
- Nunap sajunnera tamatumuuna sakkortuneruvoq, borgmesteri Reuel Limbungang oqarpoq.
Illoqarfiit pingaarnersaata Manilap avannaani illoqarfimmit 700 kilometerit missaannik ungasitsigisumi nuna nalunaaquttap-akunneri pingasut iluanni marloriarluni ukioq manna juulimi sajummat inuit ajunaartut arfineq-pingasuupput aqqunartullu 60-iullutik.
Filippinerit innermik anitsisartoqarfissuarmi 40.000 kilometerisut isorartutigisumi aamma Kangiata Amerikallu manerassuisa sineriaasa eqqaanni inissisimavoq.
Nunarsuarmi nunat sajunneri 90 procentii tassani pisarput. Taakku nunap toqqavia nunap allap toqqaviata ataanut nikikkaangat pilersarput.
Filippinerini nuna kingullermik sajorujussuarmat 2013-imi oktobarip qaammataani pivoq. Tamanna Richterskalamik uuttorlugu 7,1-iusoq inuit 220-nit amerlanerusut ajunaarnerannik kinguneqarpoq.
