FH Faxe Cup-mi ajugaavoq

Arnat anginngitsoq pillagunartoq FH Hafnarfjordurimeersoq Faxe Cup-imi finale-rtoqarnerani malunniuteqarluarpoq finale sapaat oktobarip 23-at ingerlanneqarmat. Tassaavoq Berglind Björgvindsdóttir finale-mi quleraartoq aammalu assersuinermi ilungersorluaqaluni.

FH Hafnarfjordur finale-mi 30-23-mik ajugaavoq muminnermi 16-12-mik siuaqqareerluni. GSS angummatinngujoortaraluarpoq målinik marluinnarnik kinguaqqaleraluarluni. Kisianni tassa Islandimiut sukaammeriaramik siuaqqipput naggataatigut apeqqutaaginnalerluni qanoq annertutigisumik ajugaajumaarnersut

- Kalaallit amigaatigaat assersuinermi sakkortunerunissartik, FHp sungiusaasua Jón Gunnlaugur Viggósson unammineq naammassisoq KNR-imut oqarpoq.

Unamminerlu suleqatigiinnermut ilinniutaalluarsimasoq GSS-ip aqutsisuisa unnerpaat.

- FH-meersut suleqatigiillutik saassussinertik sanarfisarpaat periarfissallu nikerarnermikkut pilersittarlutik. Kalaallit unammisartut suli amerlavallaalaaramik nammineerniartut, GSS-ip sungiusaasua Miki A. Heilmann KNR-imut oqarpoq.

GSS-ip isertitseriarneri arlalissuit islandimiut taliinut tuttarput, taamaattoq Lykke Frank Hansen GSS-imeersoq arsarluaqaaq finale-mi aqqanilinnik isertitsilluni. FH backi saamerleq Birna Helgadóttir finale-mi arsarluarnerpaatut toqqarneqarpoq.

Byholdit normu 3-nngorput NÛK 27-25-mik ajugaaffigalugu. Unammineq naammassingajalersoq unammisut naligiileraluarput unammineq tamakkiusavillugu NÛK målinik marlunik kinguaqqareersoq. Unamminermulli takussutissaalluarpoq Byholdit målinik marlunnik ajugaammata. Katrine Mikkelsen Byhold-ineersoq unamminermi tassani arsarluarnerpaatut toqqarneqarpoq. Taanna ulluinnarni Silkeborg Voel-imi unammisartuuvoq.

Aajuku ullormi finale-rfiusumi angusat:
NÛK - Byholdet 25-27 (13-14)
FH Hafnarfjordur - GSS 30-23 (16-12)