Facebookip politikkikkut allagarsiussat USA-mi præsidentimut qinersisoqarnissaanut inerteqqutiginialerpai
Inoqatinut attaveqaatip Facebookip politikkikkut allagarsiussat, USA-mi præsidentimut novembarip ulluisa pingajuanni qinersisoqarnissaanut sapaatip-akunnera ataaseq sioqqullugu inerteqqutiginialerpai.
Facebookip aallarniisua Mark Zuckerberg sisamanngornermi taama ilisimatitsivoq.
Præsidentimut qinersisoqarnissaanut sunniiniartoqarsinnaannginnissaa anguniarneqarpoq, soorlu aamma paasissutissanik kukkusunik saqqummiisoqarsinnaannginnissaa anguniarneqartoq.
Politikkikkut allagarsiutit suulluunniit malittarisassiuunneqarallartut, Mark Zuckerbergip CBS Newsimut oqaatigaa.
- Malittarisassat atuutilerpata præsidentimut atuutissaaq. Tamanullumi aamma atuutissaaq, Zuckerberg oqarpoq.
AAMMA ATUARUK Inuit pisinnaatitaaffiinik suliniaqatigiiffiit Zuckerberg isornartorsioraat
Præsident Donald Trumpip qinigaaqqinnissani anguniarlugu sassarpoq, ukiuni sisamani præsidentioqqinnissani anguniarlugu.
Unammillertaa tassaavoq demokratit sassartitaat Joe Biden, præsidentimut siusinnerusukkut tullersortaasimasoq.
Qinersisartut qinersisoqarnissaanut atatillugu unammilligassaat amerlaqisut Zuckerbergip oqaatigaa. Coronavirusip tuniluunnera matumani qitiuvoq, qinersisartummi amerlasuut allakkatigut qinersinissartik toqqassagunarpaat.
Facebook siusinnerusukkut isornartorsiorneqangaatsiarpoq, assersuutigalugu Donald Trumpip ikkussai akerleriiffiusinnaasut Facebookip iliuuseqarfigisimanngikkai isornartorsiuisut oqaatigaat.