Inuit pisinnaatitaaffiinik suliniaqatigiiffiit Zuckerberg isornartorsioraat

USA-p præsidentiata, Donald Trumpip, Facebookimut ikkussai kukkusunik paasissutissartaqarpata sioorasaarinertaqarpataluunniit Facebookip pilersitsisuata, Mark Zuckerbergip, iliuuseqarfiginianngimmagit pisinnaatitaaffiit pillugit sukataarutiginnittunit assigiinngitsunit isorineqaqaaq.

Innuttaasutut pisinnaatitaaffiit pillugit suliniaqatigiiffiit pingasut Zuckerbergip Donald Trump pillugu paasinanngitsunik iliuuseqarnera sakkortuumik marlunngornermi isornartorsioraat, nutaarsiassaqartitsivik Reuters allappoq.

Zuckerbergip Trumpip ikkussaanut iliuuseqarpallaannginnera akerliuffiginiarlugu Faceboookimi sulisut ataasinngormat suliumajunnaareersullu suliniaqatigiiffiit Zuckerbergimik isornartorsiuilerput.

AAMMA ATUARUK Trumpip nittartakkakkut attaveqatigiittarfinnut peqqussut atsioraa

Allakkatigut taasinerit aqqutigalugit qinersinermi peqquserluttuliortoqarsinnaaneranik Trump inuit internetikkut attaveqaqatigiittarfianni Twitterimi qanittukkut ikkussaqarpoq, ikkussaalu Twitterimit iliuuseqarfigineqarluni.

Twitter Trumpip ikkussaanut qanittukkut erseqqissaateqarpoq, eqqunngitsutut taallugu, ikkussaanullu atatillugu mianersoqqussummik ikkussaqarni.

Mark Zuckerbergip assingusumik iliuuseqarniarnani kingorna oqaatigaa.