Politikkikkut eqimattanut Facebookikkut innersuussisoqarsinnaajunnaartoq

Facebookimik atuisut politikkikkut eqimattanut Facebookikkut innersuunneqarsinnaajunnaarsitaapput.

Facebookip aallarniisua pisortaaneralu Mark Zuckerberg pingasunngornermi taama ilisimatitsivoq.

Politikkimut tunngasut Facebookimi killilersimaarneqarnissaat eqqarsaatersuutigileruttoritsik taassuma saniatigut oqaatigaa.

Facebookimik USA-mi atuisut politikkimut tunngasunut USA-mi præsidentimut siorna novembarip ulluisa pingajuanni qinersisoqarnissaanut atatillugu innersuunneqarsinnaajunnaarsitaapput.

AAMMA ATUARUK Facebookip politikkikkut allagarsiussat USA-mi præsidentimut qinersisoqarnissaanut inerteqqutiginialerpai

Taamaattorli tamanna iluatsippallaarsimanngitsoq, nutaarsiassaqartitsiviit arlallit - nutaarsiassaqartitsivik The Markup taakkununnga ilaalluni - oqaatigaat.

Facebookikkut eqimattat politikkimut tunngasut killilersimaarneqarnissaannut nakkutilliisut soqutigisaqaqatigiillu arlallit Facebookimut ilaatigut kaammattuutigaat.

Eqimattat taakku paasissutissanik eqqunngitsunik siammarterisartut nakkutilliisut soqutigisaqaqatigiillu tunngavilersuutigaat.

Ingasaassiniat Facebook aqqutigalugu aaqqissuussiniartarsimanerannut aamma takussutissaqartoq nalunaarutigineqarpoq.