Exxon Valdezip ajutoorneranit ukiut 25-t qaangiupput
Umiarsuaq uuliamut assartuut, "Exxon Valdez", Alaskap kujasissuani kangerlummut Prince William Soundimut 1989-imi marsip ulluisa 24-anni pulajartorpoq. Uulia akuiaganngitsoq Alaskamit USA-mi naalagaaffinnut kujsinnerusumiittunut taamani assartorpaa.
Umiarsuup aquutaa aquttuaqqamut allamut unnuap-qeqqa qaangilaaraa tunniukkamiuk, umiarsuup naalagaa, Joseph Hazelwood, immiartorfinnik tallimanik vodkatorsimavoq. Aqqutissat nalinginnaasoq ilulissanit asserneqarsimavoq, umiarsuullu naalagaata, aalakuualaaqisup, taartini naalakkerpaa, aqqut alla atoqqullugu.
Aquttuaqqalli umiarsuaq ikkarluup tungaannaanut sangutippaa.
Umiarsuaq uuliamik akuigaanngitsumik 42 millionit liiterimik uuliakoorpoq, Issittumi immamut mianernaqisumut kuuttumik - uuliakoornerlu Alaskap sineriaani 2.000 kilometerimut siaruaappoq.
- Avatangiisit ajornartorsiutaat isigissagutsigik ajunaarnersuaq una pisartuni ajornersaavoq, sakkutuunut imarsiortunut Syddansk Univertetimi biologi, Erik Kristensen, ajunaarnersuaq pillugu oqarpoq. Alaskap sineriaani imaq mingutsinneqarujussuarpoq, timmissallu 200.000-it uuliakoorfigitinnerminnit toqupput, arferpassuit mattallit, puisit aalisakkallu aamma toqorarlutik.
Uuliakoornerujussuaq nungunniarlugu saliinersuaqarmat akoorutissanik ilaatigut atuisoqartariaqarsimavoq.
Akoorutissanilli atuisoqaraluarmalluunniit uulia tamarmi peerneqanngilaq. Taamaammat Alaskap imartaata naqqani maannamut suli uuliaqaqaaq, Erik Kristensen nassuiaavoq.
Alaskami silap issinnerujussua pissutigalugu uuliakoornerup kingunipiluisa sunniutaat najummassimanartorsiorfioqaat. Alaskami immap nalinginnaaleqqinnissaa ukiorpassuit qaangiuppata aatsaat nalinginnaaleqqissinnaapput, Erik Kristensen oqarpoq.
Alaskami aalisartut 32.677-it umiarsuarmut uuliamut assartuummut "Exxon"-imut eqqartuussivilersuussipput, uuliasiortitsileqatigiiffillu 507 millionit dollarsinik akiliisussanngorlugu eqqartuunneqarpoq, tassa 2,5 milliardit koruunit sinnerlugit.
Ajunaarnersuaqarnerata kingorna pisortatigoortumik nalunaarummi atuarneqarsinnaavoq Alaskap sineriaani najugallit kingunerlutsitsillutillu isumatsassimasunngorsimasut. Tamatuma kinguneraa tamaani najugallit ukiorpassuarni imerajuttuullutillu inuttut ajornartorsiuteqarnerat.
