Takornariat akitsuuserneqartalernissaat Evaldsenip isumaliutigaa

Nunatsinnut takornariat unnuisarnerinini  unnuinerit tamarmik annikitsumik akitsuuserneqartalernissaat eqqarsaatigineqartariaqartoq, Demokraatit Inatsisartuni ilaasortaatitaat Randi Vestergaard Evaldsen isumaqarpoq.

- Tassani uani tunngavigivara mittarfissualiornissanut sanaartornissaanut tunngasut. Massakkut piareersarfigisariaqaleratsigit. Ilaatigut nunani sanilliuttakkatsinni takusinnaasaratsigu takornariaqarneq atasinnaasumik ingerlanneqarniassappat aamma arlaatigut akitsuutinik immaqa eqqarsaqqittariaqartugut, Randi Vestergaard Evaldsen oqarpoq.

Randi Vestergaard Evaldsen  §37 naapertorlugu takornariaqarnermut tunngasunik Naalakersuisunut apeqquteqarnermini bilitsisernermi ataasiartumik annikitsumik akitsuusiisoqarsinnaaneranut tunngavilersuuteqarpoq.

- Taanna annikitsoq uanga isinni takusimasara 200 koruunit missaaniippoq. Annertunngilaq, Randi Vestergaard Evaldsen oqarpoq.
Ataatsimiititaliami siulittaasoq: Akitsuusersuinerup assigiinnarpaa takornariaqarnermut toqunartulersuineq.

Sulisitsisut akunnittarfinnut, neriniartarfinnut takornariaqarnermullu ataatsimiititaliaani siulittaasoq Helge Tang allatut isumaqarpoq.

- Isumassarsiatsialaanngilaq. Takornarianut akitsuusersuinerup assigiinnarpaa takornariaqarnermut toqunartulersuineq. Tamanna umiarsuit takornariartaatit ilaasuinut akitsuusiigaluarnermi takuarput. Ajornerulersitsivormi kingornalu akitsuusiineq allanngortinneqarpoq, Helge Tang oqarpoq.

Randi Vestergaard Evaldsenillu Helge Tangip susassaqartutut oqariartuuteqarnera paasisinnaanerarpaa ataqqillugulu 

Evaldsen: Pinngortitaq illersorniarpaa

Kisianni uanga politikeritut aamma pisussaaffeqarpunga nunarput illersorniassallugu uani nunatta pissarititai, pinngortitarput, aammalu takornariaqarneq atasinnaasumik ingerlatissagutsigu illersortariaqarlugu, Randi Vestergaard Evaldsen oqarpoq.

Kisianni tassa takornariaqarnerulersitsiniarnermut akitsuusersuineq aqqutaassanngitsoq Sulisitsisunit isumaqarput.

- Maani Nunatsinni takornariaqarnerulernissarput anguniarlugu tassunga ingerlassanngilagut. Takornariaqarnermik aallutaqartuusugut tamatta takornariat akiliisinnaassuseqarluartut Nunatsinnut tikisittarnissaat anguniarsimavarput, tamannalu karsip immerneqarnissaa siunertaralugu akitsuusersuinermik kinguneqartinneqartariaqanngilaq. Allamik isertitsissutaasinnaasumik ujaasisoqartariaqarpoq, Helge Tang oqarpoq.

- Susassaqartut soorunalimi peqatigalugit aaqqiisoqarsinnaavoq. Aaqqiisoqartussaassallunilu allannguisoqassappat. Taamaattumillu Naalakkersuisunut ukua apeqquteqaatigivakka nunarput, nunatta pinngortitarsua pissarititaalu illersorusukkatsigit, Randi Vestergaard Evaldsen oqarpoq.

Randi Vestergaard Evaldsenip ilanngullugu oqaatigaa Naalakkersuisunut apeqquteqaatini akineqarsimaleriarpata takornarianut akitsuusiisoqarsinnaaneranut siunnersuuteqassanerluni nalilersorluaqqikkumaarlugu