Eva Kjer Hansen avatangiisinut inuussutissanullu ministeritut arfininngormat tunuarpoq
Lars Løkke Rasmussenip Danmarkimi naalakkersuineranut akornutaaniannginnini pillugu tunuarniuteqarluni Eva Kjer Hansenip tusagassiuutinut nalunaarummi allaaseraa. Partiit talerperliit ataqatigiiginnarnissaat Danmarkip pisariaqartippaa, Eva Kjer Hansen oqarpoq.
Avatangiisinut inuussutissanullu ministeri nutaaq ataasinngorpat toqqarneqarumaartoq Lars Løkke Rasmussenip nalunaarutigaa, Eva Kjer Hansenillu tunuarnera ajuusaarutigalugu:
- Eva Kjer Hansenip avatangiisinut inuussutissanullu ministeritut tunuarniuteqarniarnermut nalunaarutaa ullumi tiguara. Ajuusaarnaqaaq, Lars Løkke Rasmussen, statsministereqarfiup nalunaarutaani taama oqarpoq.
Nunalerinermut inatsisissatut siunnersuut assuaritittoq
Nunalerinermut inatsisissatut siunnersuut oqallisaaqisoq, Folketingimilu sisamanngormat akuersissutigineqartoq tunuliaqutaavoq.
Inatsisissatut siunnersuut taasissutigineqarmat konservatiivinit tapersersorneqarpoq, kisitsisilli siunnersuummut attuumassuteqartut ilaatigut kukkusuusut konservatiivit isumaqarput.
Eva Kjer Hansenimut tatiginninnginnermut takutitsiniarnermi partiinit amerlanerussuteqartunit tapersersorneqarpoq, tassa partiit saamerliit konservatiivillu tatiginninnginnermik takutitsiniarnermi amerlanerussuteqaramik.
DR-ip politikkikkut naliliisartua Christina Cordsen Eva Kjer Hansenip tunuarniuteqarnera pillugu ullumi apersorneqarami oqarpoq Kjer Hansenip tunuarniuteqarnera partiit talerperliit akornanni ajorsaartitseqisoq:
- Partiit talerperliit akornanni pissutsit ajorseriaannarput. Ulluni kingullerni pisut amerlaqaat, konservatiivilli ajugaanerattut isigisinnaanngilara, Christina Cordsen oqarpoq.
Ajornartorsiuteqarpoq
Eva Kjer Hansenip tunuarnerata kingorna partiit talerperliit akornanni ataqatigiinnerusoqartariaqalersoq, Lars Løkke Rasmussenip DR-imit TV2-millu apersorneqarami oqaatigaa.
Konservativit, Liberal Alliance Dansk Folkepartilu tamanna pillugu sisamanngorpat oqaloqatiginialersaarpai, ajornartorsiutit aaqqiivigineqarnissaat siunertaralugu oqaloqatiginialersaarlugit. Venstrekkummi naalakkersuisuutitaqarnertik annaasimasinnaagaluarpaat.
- Tatiginninnginnermut tunngaviusut iternga tikillugu oqaloqatigiissutigisariaqarparput. Sunaana ajornartorsiutaasoq? Arlaannimmi ajornartorsiuteqarpugut, Lars Løkke Rasmussen oqarpoq.
