Europamiup itsarsuarnitsap timaata sananeqaataata misissuiffineqarnera naammassivoq
Spaniamiuusimasup ukiunik 7000-nik pisoqaassusillip nassaarineqarnerata kingorna, taassuma timaata sananeqaataasa misissorneqarneranni, paasinarsivoq paasissutissat imaannaanngitsut nassaarineqartut, atuagassiaq ilisimatusarnermik allaaserisaqartartoq, Nature taama allappoq.
Qallunaat spaniamiullu ilisimatuut suleqatigiinnerisigut, europap inoqqaavisa qanoq isikkoqarneri paasiniarneqarpoq, ilaatigut qallunaaq ilisimatooq, professor Eske Willerslev, Københavnip Universitetiani professoriusoq suleqataalluni.
Ukiut 7000-it matuma siorna, Spaniap avannaani inuit inuusut taartunik ameqassagatinneqarput, kajortut qaamasunik nujaqarlutik aamma tungujortunik iseqarlutik. Taakku ullutsinni inuusunut naleqqersuunneqarsinnaajunnaavissorsimapput aamma ullutsinni europamiut timaasa sannaneqaataannut assersuunneqarsinnaajunnaarsimallutik.
- Sibiriami nukappiaqqap, ukiunik 24.000-inik pisoqaassusillip 1920-kunnilu nassaarineqartup, timaata sananeqaataanut europap inoqqaavisa timaasa sananeqaataat assigusuusoq aamma maanna paasineqarpoq. Taama oqarpoq professor Eske Willerslev imalu nangilluni.
- Ullutsinni inuusugut timerput allarluinnarmik sananeqaateqalersimavoq, taamaalisimalluni inuiaqatigiit allat europamiunut akulerunnerisa kingunerisaanik. Oqartoqarsinnaavoq spaniamiup ukiunik 7000-nik pisoqaassusillip, europamiut maanna inuusut siuaasarigaat.
Eske Willerslev oqarpoq imalu nangilluni.
- Sibiriami nukappiaqqap nassaarineqartup timaata sananeqaatai, amerikap avannaani indianernut assersuunneqarsinnaapput, taamaalillunilu aamma europamiunut maanna assersuunneqarsinnaalluarlutik.
Eske Willerslevip aamma oqaatigaa, spaniamiup ukiunik 7000-nik pisoqaassusillip, europap avannaamiuinut maanna inuusunut saneqataatai assigusuummata, taamaalilluni taanna Qallunaat siuaasarisinnaalluaraat oqaatigalugu.
