Europa-mi annertuumik tunillaassuunneq WHO-p isumakuluutigaa
Omikron Europa-mi tunillaassuunnerpaanngormat suli tuniluunnerunissaa Nunarsuatsinni Peqqinnissamut Nakkutilliisoqarfik (WHO) kalerrisaarivoq.
Virusi nutaaq taanna sapaatip akunneri sisamat matuma siorna saqqummeramili maanna Europa-mi nunani 53-it akornanni 38-ni nassaarineqareerpoq.
WHO-p siulittaasua, Hans Kluge, marlunngormat oqarpoq.
- Sapaatip akunneri arlaqanngitsut ingerlaneranni omikron tamaani nunani allani tuniluutilerpat tuniluunnersuaqalersinnaanera takusinnaavarput, taanna oqarpoq.
Omikron pillugu suli ilisimasaqartoqarpiganngitoq Kluge-p erseqqissarpaa.
Taamaattorli omkron sukkasoorujussuarmik tuniluuttoq ilisimaneqarpoq.
Omikron-imik tunillatsittut amerlariarujussuarput
Nunani arlalinni, aamma Danmark-imi, Portuga-imi Tuluit Nunaannilu Omikron tuniluunnerpaanngorpoq, ulloq allortarlugu imaluunniit ullut pingajussaanni tunillatsittut marloriaatinngortarlutik.
Taamaalilluni takuneqarsinnaavoq, allannguut taanna allannguutinit allanit sukkanerujussuarmik tuniluuttoq.
AAMMA ATUARUK Tamaat isigalugu: Coronavirus pillugu killiffik
Hans Kluge-p oqaasii naapertorlugit, omikron aamma peqqinnissaqarfinnut sunniuteqassaaq.
- Covd-19 nutaaq taanna amerlanerusut nappasimmasinnut unerarnerannik kinguneqarsinnaavoq peqqinnissaqarfinnillu artukkiisinnaalluni, Kluge oqarpoq.
Delta-miit sukkanerusumik tuniluuppoq
Coronap allannguutaanit Delta-mit sukkanerusumik omikron tuniluuttoq uppernarsaatissaqartillugu, ataasinngormat WHO-mi pisortap Tedros Adhanom Ghebreyesus-ip oqaatigaa.
Taassuma aamma oqaatigaa, inuit coronamik tunillatsereernikut omikron virusimik tunillatsillutik napparsimaleqqissinnaanerat ilimanarsinnaasoq.
Taassuma aamma nunarsuarmi tamanut kaammattuutigaa virusip akiorniarnerani ataqatigiittariaqartugut.
Tamatuma kinguneranik nuanniitsunik suliniuteqartoqalersinnaavoq killilersuisoqarlunilu. Ukiulli ataatsip ingerlanerani coronap tuniluunnera unitsinneqassappat, nunarsuarmioqatigiit tamatta suleqatigiittariaqarpugut, taanna oqarpoq.
