EU-p coronamut akiuussutissat akuerigai

Pfizerip Biontechillu coronamut akiuussutissaliaat EU-Kommissionip ataasinngornermi unnukkut inaarutaasumik akueraa.

EU-Kommissionip siulittaasua, Ursula von der Leyen, taama ilisimatitsivoq.

- Covid-19-ip akiorniarneranut kapitali siulleq ullumi aallartipparput. Covid-19-imut akiuussutissaliani piareerneqaqqaartup europamiunit tamanit atorneqarsinnaalissasoq aalajangerpugut, von der Leyen tusagassiortunik Bruxellesimi katersortitsinermi oqarpoq.

- Coronavirusimut akiuussutissaliani piareeqqaartuuvoq. Coronavirusimut akiuussutissaliat allat naviananngitsut sunniuteqarluarsinnaasullu erserpat akuerineqarsinnaapput, taanna oqarpoq.

AAMMA ATUARUK Coronamut akiuussutissaq EU-mit ullumi akuerineqarsinnaasoq

- Akiuussutissaliani piareeqqaartoq neriorsuinerput malillugu EU-mi nunani tamani ataatsikkut assigiissumillu atorneqarsinnaalissaaq, von der Leyen oqarpoq.

Tyskit peqqissutsimut ministeriata, Jens Spahnip, pisoq una nunarsuaq tamakkerlugu tunillaassuunnerup akiorniarnerani pingaartuunerarpaa.

Coronavirusimut akiuussutissat siulliit Danmarkimut ulluni tulliuttuni tikissasut, nakorsaasiorfissuup Pfizerip Danmarkimi immikoortortaqarfiata tusagassiuutinut nalunaarutigaa.

Taamaammat covid-19-imut akiuussutissat 3.000-t missaat nunatsinnut juullip ukiortaallu akornanni tikissangatinneqarput.

Nunatta nakorsaanera, Henrik L. Hansen, KNR-imut sapaatit akunnerata siuliani sisamanngornermi taama oqarpoq.