EU-mik isumaqatigiissut akuersissutigineqarpoq
Taamaalilluni Kalaallit Nunaata, Danmarkip EU-llu ukiorpassuarni qanimut suleqatigiinnerisa nutarterneqarnissaanik isuma piviusunngortinneqarluni.
Nunarsuatsinni aningaasarliornerup kinguneranik, Kalaallit Nunaannut missingersuutitigut tapiissutaasartut, procentinik 17-inik ikilisinneqarnissaat siunertaagaluarpoq.
- Tapiissutaasartut taakku annikillisinneqarsimasuuppata, tamanna Kalaallit Nunaannut annertuumik kinguneqarnerlussimassagaluarpoq, Naalakkersuisut siulittaasuat, Aleqa Hammond taama allappoq.
Ukiuni 2014-imit 2020 tikillugu, 1,6 milliardit koruunit Kalaallit Nunaannut missingersuutitigut tapissutigineqartartut allanngorneqannginnissaat, EU-mi inatsisartunit isumaqataaffigineqarpoq.
Aningaasat tapiissutigineqartut, Nunatsinni ilinniagaqarnerup pitsanngorsarneqarnissaannut atugassatut aalajangiunneqarput, taamaalilluni Kalaallit Nunaata aningaasaqarneranut pitsanngorsaatitut isigineqartariaqarlutik.
Taama isumaqatigiissuteqarneq Naalakkersuisut siulittaasuata Aleqa Hammondip nuannaarutigaa.
- Kalaallit Nunaata angusaa kusartoq naammagisimaarpara, ingammillu atorfillittat - soorlu Kalaallit Nunaata Bruxellesimi Sinniisoqarfiani sulisut aamma danskit EU-mi sinniisoqarfiani sulisut, sivisuumik oqimaatsumillu suliaqarsimasut naammagisimaaqalugit, Naalakkersuisut siulittaasuat oqarpoq.
Danskit nunanut allanut tunngasunut ministeriat Martin Lidegaard aamma naammagisimaarinnippoq.
- Nuannaarutigaara Kalaallit Nunaata EU-llu akornanni peqatigiilluni pissutsit aalajaatsut ingerlateqqissagatsigit. EU-p Kalaallit Nunaannik suleqateqarnerminik qitiutitsinini taamaasilluni uppernarsarpaa. Tamannalu siunissami suleqatigiilluarnissamut pingaaruteqarpoq, nunanut allanut tunngasunut ministeri Martin Lidegaard oqarpoq.