EU-mi nunanut niueqateqalersinnaaneq aammaanneqarpoq

Nunatta EU-mik niuernikkut suleqateqalernerata kinguneranik, Nunatta pissarititaannik EU-mi nunanut niueqateqalersinnaaneq aammaanneqarpoq.

Niuernikkut ammaassineq aprilimili atuuttinneqaleraluartoq, pisortatigoortumik tamanna aatsaat ippassaq marlunngornermi malunnartinneqarpoq.

Nunatsinnit tunisassiat avammut nassiussuunneqannginneranni EU-p nakkutilliivia, Nuummi umiarsualivimmi Royal Arctic Linep allaffeqarfiani ippassaq atoqqaarfissiortinneqarluni, atoqqaartitsisuullutillu danskit inuussutissaqarnermut ministeriat, Dan Jørgensen aamma Aalisarnermut Piniarnermut Nunalerinermullu Naalakkesuisoq, Finn Karlsen.

Aningaasartuutit ikilissasut
EU-p nakkutilliiveqalerneratigut Nunatsinni aalisakkat pisarineqarlutik nunanut allanut aallarunneqannginneranni aningaasartuutit ikilinissaat naatsorsuutiginerarlugu nuannaarutigalugulu, Finn Karlsenip oqaatigaa.

- Nakkutilliiveqalerneq assigiinngitsunik arlariinnik pitsaaquteqarpoq.

- Ilaatiugt aalisartut pisaat tulaassat aningaasartuutikinnerulissallutik, tassami pisat tulaanneqareerneranni aalisakkat Danmarkimut nassiunneqartaraluarput misissugassatut, maannali maani tassa misissorneqaannartalissapput, tamannalu iluarpoq.

- Maani nakkutilliiveqalernermi suliffissat qulit missaanniittut aamma pilersinneqartussaassapput tamannalu qujanarpoq, Aalisarnermut Piniarnermut Nunalerinermullu Naalakkersuisoq Finn Karslsen taama oqarpoq.

Periarfissanik nutaanik ammaassisoq
Danmark EU-mut ilaasortaavoq, Nunarpulli ilaasortaanani. Taamaakkaluartoq EU-mik nuieqateqalerneq periarfissanik pitsaasunik ammaassisoq, danskit inuussutissanut ministeria, Dan Jørgensen oqarpoq.

- Europami nunanut niueqateqarneq ammaanneqassappat, Kalaallit Nunaanni nakkutilliiveqartariaqarpoq, isumaqatigiissullu maanna pisoq pitsaalluinnarpoq, tassami aalisakkat Kalaallit Nunaanni pisarineqartut tunitsivissaqartinneqalernissaannik ammaassimmat.

- Nakkutilliiveqalerneq danskit naalakkersuisuinit tapersersorneqarluassasoq aamma naatsorsuutigineqassaaq, danskit Inuussutissaqarnermut ministeria, Dan Jørgensen taama oqarpoq.

Aalisakkat nunanut allanut umiarsuartigut nassiunneqannginneranni nakkutilliisuussapput, Nunatsinni Uumasut Nakorsaqarfianni aamma Inuussutissat pillugit Nakkutilliisoqarfimmi sulisut.

EU-p Nunatsinni nakkutilliiveqalernissaa, danskit inuussutissanut ministereqarfiannit Namminersorlutillu Oqartussanit isumaqatigiissutaalluni pilersinneqarpoq.