EU issittumi misissuisarfimmik pilersitserusuppoq

Tamatumunnga atatillugu Finlandip avannaaniittoq illoqarfik Rovaniemi misissuinermik ingerlatsinermi qitiusussatut siunnersuutigineqarpoq, taamaalilluni Issittoq pillugu siunissami naalakkersuinikkut aalajangiisarnissani, ilisimatuussutsikkut tunngavigineqartussat qulakkeerneqarniassammata.

EU-p Imarsiornermut Aalisarnermullu qullersaqarfiani pisortap Bernhard Friessip oqaatigaa, EU-mi inatsisartut siunnersuutaat EU-Kommissionip ilassilluaraa, tamannalu Nunani Avannarlerni ministerrådi suleqatigilluinnarlugu piviusunngortinniarneqassasoq.

Taassuma erseqqissarpaa, EU Issittumi ilisimatusarnermut aningaasarsiornissamullu siuarsaanissamut pisussaaffeqaannarani, aamma Issittumi pinngortitami oqimaaqatigiissumik inuussutissarsiortoqarnissaanut akisussaaffeqarmat.
Pujoorfissuit aniatitaasa 45 procentii aamma kviksølvimik mingutsitsinerup 24 procentia nunanit EU-mut ilaasortaasuneersuusut issittumut annguttartut Berlinimi Økologiske Institutimit oqaatigineqarpoq. Pujoorfissuit sermip aakkiartornera annerulersippaat, aamma kviksølvi nunap inoqqaavinut aalisarnermik pinngitsuuisinnaanngitsunut aarlerinartorsiortitsivoq.

EU-p Issittumi misissuisoqarfimmik pilersitsiniarnera immikkut ilisimasalinnit iluarineqarpoq.

- Nunap inoqqaavi Issittumiittut puisinniarnermut arfanniarnermullu isumaqatigiinngissutit pissutigalugit EU-p suliniutaanut pasilleqqajaasuupput qularinnittarlutillu. EU-p aningaasarsiornikkut siuariartornissamut tapersersuinerata aamma Issittumi pissusiviusunut paasinnikkumannginnerata imminnut ataqatigiinnginnerat paasineqareerpoq, ilisimatuut ilaatigut taama naliliipput.