EU inerteqquteqarnissamik siunnersuuteqarpoq

EU-p nukissiuuteqarnermut kommissæriata siunnersuutaani, Mexicop Kangerliumanersuani uuliamik maqisoorneq tunuliaqutaavoq.

Nordsømi, Sortehavimi Akullersuarmilu immami itisuumi qillerinissamut pilersaarutit EU-mi nukissiuuteqarnermut kommissærip Günther Öttingerip unitsinniarpai.

Taassuma oqaatigaa, malittarisassat nutaat sillimaniarnermullu malitassat nutaat uuliasiornermut iluaqutaassasut, tassami Mexicop Kangerliumanersuani ajutoornerup kingorna tatiginninnermik pilersitseqqissammata. Tamatumalu saniatigut ukiormanna immami itisuumi nutaamik qillerinissaq pisariaqartinneqavinngittoq, Öttinger oqarpoq.

Nukissiuuteqarnermut kommissærip uuliasiortitseqatigiiffiit 22-t ippassaq ataatsimeeqatigai, taassumalu Norge, EU-mut ilaasortaanngitsoq, maligassiuilluartutut taavaa.

Norgep, Europami uuliasiortuni annerpaasup, immami itisuumi qillerinissamut pilersaarutini tamaasa unitsikkallarpai, Norgelu taamaaliorsinnaappat aamma EU taamaaliorsinnaasoq oqaatigalugu.

Uuliasioqatigiilli manngertitaarput. Michael Engel Jensen, nunat tamalaat uuliasioqatigiiffianni gassisioqatigiiffiannilu pisortaasoq oqarpoq, taamatut inerteqquteqarniarneq, BP-p ajutoorneranut patsisaasut paasineqareertinnagit uuliasiortut inerteqquteqarniarnermut akerliusut.

- Isumannaallisaanernik aaqqissuussinitsinni, Europami qillerinissamut akornutaasinnaasunik naammattuugaqanngilagut, Michael Engel Jensen oqarpoq.

Taamaattorli EU-kommissionip isumannaatsuunissamut piumasaqaatit pitsanngorsarneqarnissaat aalajangiusimavaa. Öttingerip EU-mut ilaasortat maanna oqaloqatiginiarpai, inerteqquteqarnissamut peqataajumalernissaat anguniarlugu. Tamatuma saniatigut uuliasioqatigiit uuliamik maqisuussagaluarunik ajoqusiinerminnut saliinissamut akissaqarnerminnik uppernarsaasinnaanissaannik piumasaqarsinnaanissaq taassuma isumaliutaannut ilaavoq.

Piumasaqaatini angusinnaassanerai apeqqutaaginnalerpoq. Tassami nunat EU-mut ilaasortat naalakkersuisui Europaparlamentilu tamatumunnga aalajangiisussaammata. Tamannalu anguneqassappat sivikinnerpaamik ukiut marluk qaangiuppata aatsaat piviusunngortinneqarsinnaassaaq.