EU Bavarianip abekoppinut akiuussutissaliaanik pisisoq

EU abekoppinut akiuussutissanik 110.000-nik pisivoq. Tamatumani isumaqatigiissut ullumi marlunngornermi atsiorneqassasoq, nutaarsiassaqartitsivik Reuters allappoq.

Abekoppinut akiuussutissaliaminnik Imvaneximik Europami taaneqartartumik EU pisiniartoq, Danmarkimi nakorsaatiliorfik akiuussutissaliorfillu Bavarian Nordic ullumi marlunngornermi ilisimatitsivoq.

Bavarian Nordic ukioq manna 100 millionit koruuninik kaaviiaartitaqassangasimavoq, abekoppinulli akiussuutissaliaanik EU-p pisinera peqqutaalluni ukioq manna 1,9 milliardit koruunit 2,1 milliardit koruunillu akornanni kaaviaartitaqassangalerpoq.

Abekoppinut akiuussutissat qaammatip massuma naanerani tunniunneqassasut, EU-p peqqissutsimut qullersaqarfianeersoq Stella Kyriakides oqarpoq.

Akiuussutissat taakkua EU-p akilissagai nunanullu EU-mi ilaasortanut assigiinngitsunut nassiussorneqarumaartut, Stella Kyriakides EU-p peqqissutsimut ministerii ataatsimeeqatigeernerini oqarpoq.

EU-p nalunaarsugai naapertorlugit inuit 900-t abekoppimik tunillanneqarsimasut, Stella Kyriakides oqarpoq.

AAMMA ATUARUK Nakorsaaneqarfik: Abekoppit ernumassutiginagit

Danmarkimi nakorsaasiorfiup akiuussutissaliorfiullu Bavarian Nordicip kuppinut akiuussutissaliaata abekoppinut akiuussutissatut atorsinnaaneranik misileraanissaq pillugu oqaloqatigisimallugu EU qaammammi uani siusinnerusukkut oqartoq, nutaarsiassaqartitsivik Reutersip allappoq.

Bavarian Nordicip kuppinut akiuussutissaliaa abekoppinut akiuussutissatut atorneqarsinnaasutut USA-mi akuerisaavoq.

Danmarkimi inuit abekoppimik tunillanneqarsimasutut nalunaarsorneqarsimasut juunip qulanganni katillutik sisamaapput. Abekoppimik tunillatsissimasoq siulleq maajip 23-anni paasineqarpoq.

Abekoppit Danmarkimi tuniluunnerannik maannamut suli takussutissaqanngilaq. Tunillanneqarsimasulli nunami allamiinnerminni tunillatsissimapput.

Nappaammik tuniluuttumik, tassa abekoppimik tunillatsissimasut kissarneqarnermik pullaqinernillu qaqortunik mamikkaangamik ikeqalersitsisinnaasunik naajorarnermik ersiuteqarsinnaasarput. Nappaat taanna sapaatit akunneri marluk sisamallu akornanni atuukkajuppoq namminerlu qaangiutikkajulluni.

Ingammik tunillanneqarsimasumit attorneqarnikkut tuniluukkajuppoq. Ersiuteqalereernermi aatsaat tuniluuttarpoq.

Danmarkimi inuit abekoppimik tunillanneqarsimasumut qanillisimasut akiuuussuserneqarsinnaapput.

Nunat EU-mi ilaasortat ilaat, soorlu Tyskland Spanialu, abekoppinut akiuussutissanik aamma pisipput.

Danskit naalakkersuisuisa abekoppinut akiuussutissanut aningaasartuutaat 3,9 millionit koruuniupput.