Ersinngitsumik tapiisarneq ataavartunngorlugu allanngortilersaarpaat
Naalakkersuisut aningaasaqarnermut ataatsimiititaliamut qinnuteqarnerminni ilaatigut allapput, nuna tamakkerlugu aviisinut saqqummersinneqartartunut ersinngitsumik toqqaannanngitsumik tapiissuteqartarnerup, ammasumik takuneqarsinnaasumilllu pisalernissaa Naalakkersuisunit kissaatigineqartoq.
Inatsisartut Aningaasaqarnermut Ataatsimiititaliaata Naalakkersuisunut ilisimatitsinerani 5. oktober 2012-imi allagaanni atuarneqarsinnaavoq, nuna tamakkerlugu aviisinut utaqqiisaagallartumik tapiissutit 1,5 million kr-niusut ataavartunngortinneqarnissaat 2013-imi aningaasanut inatsisissatut siunnersuummi siunnersuutigineqartoq, aningaasaqarnermut ataatsimiititaliamit akuerineqartoq.
Aviisinut nuna tamakkerlugu saqqummersartunut 1 mio. kr.-inik ersinngitsumik tapiissuteqarnissaq Aningaasaqarnermut Ataatsimiititaliamit akuerineqarsimanera pillugu KNRip nittartagaani knr.gl-mi allaaserineqarnerata kingorna aningaasaqarnermut ataatsimiititalip siulittaasua Andreas Uldum allaaserisaq eqquinngitsoq tusagassiuutinut allagaqarluni nalunaarutigaa.
Naak Aningaasaqarnermut ataatsimiititaliaq Naalakkersuisunut nalunaaruteqarluni imatut allattoq:
"Aviisinut nuna tamakkerlugu saqqummersartunut ersinngitsumik toqqaannanngitsumillu tapiissuteqartoqartarsimaneranik aammalu tamatuma ammasumik takuneqarsinnaasumillu pisalernissaata kissaatigineqarnera Naalakkersuisunit paasissutissiissutigineqarmat Aningaasaqarnermut Ataatsimiititaliamit tusaatissatut tiguneqarpoq".
Tamanna pissutigalugu ataatsimiititaliaq inussiarnersumik Naalakkersuisunut kaammattuuteqarpoq siunissami qinnuteqaatinik Aningaasaqarnermut Ataatsimiititaliamut akuerisassanngorlugu nassiussinermi aqqutit eqqortut atorlugit nassiussisarnissaanik, missingersuusiornermut inatsimmi piumasaqaat sukumiisumik isumaliutigeqqaartaqqullugu.
Nuna tamakkerlugu aviisiut utaqqiisaasumik tapiissutit aningaasanut inatsit aqqutigalugu tunniunneqartut siorna 2011-mi ukiormannalu 2012-mi 1,5 milioner koruniupput. Aappaaguli 2013-mi aviisinut tapiissutinut qinnuteqaammi 2,5 million koruuninngornissaat Naalakkersuisuinit siunnersuutigineqarpoq.
Aviisini Sermitsiami Atuagagdliutinilu akisussaalluni aaqqissuisoq Poul Krarup radiaoviisimut oqarpoq, aningaasatigut tapiiffigineqarnissamik periarfissaq tamanna aviisit ukiut tamaasa atortaraat, tamannalu ersinngitsumik tapiissuteqarnermik KNR-imit isigineqarnera paasissinnaanagu, tapiissuteqartarneq aningaasanut inatsimmi 2011-imili periarfissaareermat.
Aviisit tapiiffigineqartarnerat pillugu Poul Krarup oqaaseqarnianngilaq.
Namminersorlutik Oqartussat sipaarniarnerminni aviisini piseqqusaarutit ilanngullugit sipaarniarfiginikuuaat. Tamatuma kinguneranik aviisit aningaasaqarniarnerat eqqorneqarmat nunatsinni aviisit saqqummersartut marluk annertuumik maalaarutigalugu samminikuuaat.
