Ersarissumik akissutisinissaq naatsorsuutigineqanngilaq

DIIS-ip suliassamik tamatuminnga tigusilluni nunanut allanut tunngasunut ministerimut nalunaarutaani tamanna atuarneqarsinnaavoq.

- Amerikamiut sulianut tunngasuni pisortanit paasissutissinneqarsinnaanermut malittarisassat atorlugit piffissaliussap iluani naammassisaqarsinnaanissaq piviusorsiortutut oqaatigineqarsinnaanngilaq. Tassalu DUPI-miit DIIS-miillu siusinnerusukkut qulaajaanerniit allaanerussutigivaa, Amerikamiut isumaliutersuutigisarsimasaat aalajangernissanilu periusaat pillugit itinerusumik ilisimasaqalernissaq naatsorsuutigineqarsinnaangimmat. DIIS-ip pisortaata nunanut allanut tunngasunut ministerimut Villy Søvnadalimut akissuteqarluni allagaa taama nipeqarpoq.

Allatut oqaatigalugu; CIA-p Nunatta Danmarkillu silaannartaanik atuisarsimaneranut tunngasunik akissutisinissarput naatsorsuutigisinnaanngilarput.

Misissuinissamut piffissaliussaq sivikeqaaq. Misissuineq qaammatit tallimat affaat qaanngiuppat naammassineqareersimmassaaq.
DIIS-ip pisortaata Nanna Hvidtip nunanut allanut tunngasunut ministerimut akissummini aamma tikkuarpaa, misissuinissami siunertaq najoqqutassallu tungavigineqartussat misissuinissamut inissakitsitseqisut.

Misissuinissaq marlunnik annermik siunertaqarpoq. Siullermik misissuinermi siullermi, atorfilinnit ingerlanneqartumi, najoqqutarineqartut misissussallugit, aappassaanillu misissuinerup tamatuma suliarineqarneranut atatillugu Danmarki USA-lu aalajangersimasumik inerniliinissamik isumaqatigiissuteqarsinnaanerarlugit pasilliutit misissussallugit.

Piffissaliussarli ima sivikitsigaaq, DIIS-p taamaallaat angumerisinnaallugu, misissuinermi siullermit nalunaarusiami najoqqutarineqartunik sukkut tamaana tigusilluni misissuisinnaalluni. Pisortaq taama allappoq.

DIIS-ip siulersuisuisa misissuinermut akisussaasutut inissisimanissartik kissaatiginngilaat, taamaammallu misissuineq taamaallaat pisortamit ilisimatuunillu akuusunit akuerineqassalluni, siulersuisuniunngitsoq.

Allaaserisat, DIIS-ip misissuinermini najoqqutanerineqartussat, pisortat akuersinerisigut aatsaat tunniunneqartassapput. DIIS-ilu taamaattumik ammasumik pissuseqarnissamik kaammattuivoq, Nanna Hvidtilu akissuteqarluni allakkamini arlaleriarluni erseqqissaavoq, pappialat atugassamik ingerlaannaartumik tunniunneqartarnissaat pingaartuusoq.

Ilisimatuut kikkorpiaat misissuissanersut suli aalajangerneqanngitsoq, pisortaq ilisimatitsivoq.