Ernisussiortoqarsinnaaneq pillugu pingaarnersiuineq Siumup paaserusuppaa

Illoqarfinni tamani ernisussiortoqarsinnaaneq naalakkersuisut pingaarnersiunerminni aaqqiissutissamik ujartuisimanersut Aleqa Hammondip apeqqutigaa.

Illoqarfinni tamani napparsimmaveqarfinni peqqissaavinnilu juumuunik ilinniarsimasunik ernisitsisinnaasunik naalakkersuisut atorfinititsinissaannik Kalaallit Nunaanni juumuuut naalakkersuisunut alllagaqarlutik sapaatip akunnerani kingullermi kajumissaaruteqarput.

Tamannali peqqissutsimut naalakkersuisumit Agathe Fontainimit itigartitsissutigineqarpoq, erninermi isumannaallisaaneq pilatttaasariaqarnerlu pisariaqalersinnaasarmata.

Ernisitsisarnerit sumiiffinni aalajangersimasuni pisarnissaat anguniarlugu naalakkersuisut suliniuteqartut, Agathe Fontain oqarpoq.

Naartusut najugaqarfigisatik qimallugu erniartortut, ajornartorsiutigisartagaat akiorniarneqartariaqarput Agathe Fontain akissuteqarluni taamatut oqarpoq, peqqinnissaqarfimmi sipaarniuteqarneq patsisaasoq unnerlugu.

Agathe Fontainip akissutaa Aleqa Hammondimit naammagineqanngilaq.

- Ernisussat illoqarfimmut allamut angallanneqartarput nunattalu aningaasaqarneranit akilersorneqartartut akisullunilu, taamaattoq peqqissutsimut naalakkersuisoq oqarpoq juumuut amerlanerusut atorfinitsinneqarsinnaaneri akissaqartinneqanngitsut Aleqa Hammond oqarpoq.

Aleqa Hammondip paragraf 36 naapertorlugu naalakkersuisunut apeqqutigivaa juumuut amerlanerusut atorfinitsinneqarnissaannut akissaqannginnerarneq sumit tunngaveqarnersoq.