Ernisarfik matunagu
Juumuut peqatigiiffiata siulittaasua, Rikke Kuhn oqarpoq tamanna assuarnaqisoq.
- Ernisarfiup ingerlalluartup atorunnaarsinneqarnissaa uggornaqaaq. Angajoqqaanngortussat naakkinarput, tassami allamut erniartortalertussaassagamik. Aamma ernisarfimmi sulisut ilaasortakkalu oqarfigisariaqassavakka, tassa suliunnaartariaqartut, tamannalu artornarnerpaassaaq, Juumooq Rikke Kuhn oqarpoq.
Taanna ilaquttanilu Nuummut maajip aallaqqaataani nuuttussaapput, tassalu ulloq taanna Maniitsup ernisarfia aamma atorunnaarsinneqassalluni.
Rikke Kuhnip atorfimminit qimagunniarnerani allamik taartissaanik atorfinitsitsisoqarsinnaaneranik qanoq iliuuseqartoqarsimanngilaq.
- Atorfinittussamik qinnuteqarlutik allagartaliisimanngillat. Juumuumik atorfinitsitsikuttoorsinnaagaluarput, Rikke Kuhn oqarpoq.
Taassuma ernumagisaasa ilagaat, ernisussat illoqarfimmut allamut aallartittalerneqarnissaat.
- Sisimiunut erniartortalernissaq soorunami annertuumik kinguneqassaaq, tassami Maniitsumiit Sisimiunut ungasiinnarani aamma akisuvoq, Rikke Kuhn oqarpoq.
Maniitsumi ernisarfiup matuneqarnissaanik nalunaaruteqarneq, sulisut assorsuaq tupaatigisimagaat, peqqissaasunut ikiortip, Karoline Olsenip oqaatigaa.
- Ilisimatinneqannginnerput ingasappoq, tassammi aamma innuttaasut naartusullumi ilisimatinneqanngivillutik, ernisarfiup matuneqarnissaanik nalunaarut ullormiit ukllormut pivoq, tamannalu assorsuaq ingasaginarpoq.
Karoline Olsenip ilanngullugu oqaatigaa Maniitsumi ernisarfiup matuneqannginnissaa sulissutigissallugu piareersimalluni, aammali oqaartigalugu tamanna ilugersunassasoq.
- Peqqinnissaqarfiit ataasiakkaat kattussuunneqarneri pillugit apriilip 13-anni ataatsimiisinneqassaagut, naatsorsuutigaaralugu ataatsimiinnermi oqallittoqagaatsiarnissa, ingammik ernisarfiup matuneqarnissaa pillugu, Karoline Olsen oqarpoq.
Maniitsup ernisarfiani juumuumik atorfinitsitsisoqannginnissaa, juumuumut Rikke Kuhnimut ilungersunarpoq.
- Nuummut nuussanngitsuuguma Maniitsumi ernisarfik immaqa atuutiinnarsimassagaluarpoq, taamaattumik tamanna artorsaatigeqaara.
Maniitsup ernisarfiani juumooq, Rikke Kuhn taama oqarpoq.
