Ineqarnermut atugassanik aningaasanik taarsigassarsineq Erniat aatsaat taama appasitsigisut atorniarnernik nutaanik kinguneqarpoq
Realkreditinit taarsigassarsinermi erniat taama appasereertigisut suli appariaqqipput. Tamatuma kinguneraa Danmarkimi Jyske Realkredit taarsigassarsinermik nutaarluinnarmik sapaatip akunnera manna periarfissiimmat. Tassaavoq ukiuni qulini akilersugassamik aalajangersimasumik ernialimmik taarsigassarsineq minus 0,5 procentimik ernialik.
Aatsaat taamaattoqarpoq, Grønlandsbankenimi inuinnarnik sullissinermut pisortaq Mads Andersen oqarpoq.
- Ataatsimut isigalugu erniat aatsaat taama appasitsiginerannik kinguneqarpoq. Erniat aalajangersimasut oqaluttuarisaanermi aatsaat taama appasitsigipput.
Iluaqutissartalinnik ernialerlugit taarsigassarsineq siornatigut periarfissasimavoq, kisianni aalajangersimasunik ernialinnuunngitsoq. Ingerlaannartumilli nunatsinni ineqarfinnut taarsigassarsiatsinnut minusimik ernialiisoqarnissaa ilimagissanngilarput.
Nunatsinni realkreditimit taarsigassiat amerlanersaannik isumaginnittumit Nykreditimit taama nalunaartoqarpoq.
- Massakkorpiaq ukiuni qulini akilersugassanut minusimik ernialiinissaq Nykreditip pilersaarutiginngilaa, kisianni erniat appariartuinnassappata taamaaliortarioqassapput Mads Andersen oqarpoq.
Taarsigassarsinerit atorneqarnissaannut erniat minnerusut
Taarsiulluguli Nykredit, Grønlandsbankenimi aamma Bank Nordikimi ineqarnermut atugassanik taarsigassarsinermik isumaginnittoq, niuffaffimmut qisuariarnertut taarsigassarseriaatsinik nutaanik marlunnik neqerooruteqassasoq inuinnarnik sullissinermut pisortaq oqarpoq.
- Tamatuma kingunerissavaa taarsigassarsiat ukiuni 30-ini akilersugassat procentip affaanik erniaqassammata ukiullu 15-t taarsersugassat erniaqassanatik, oqarpoq.
AAMMA ATUARUK Angerlarsimaffeqanngitsut aningaasanik tigutsisitaarnissaat periarfissaalertoq
Nunatsinni aalajangersimasumik ernialinnik assigiingitsunik sisamanik ineqarnermut taarsigassarsisoqarsinnaavoq. Taakku ukiuni 10-ni, 15-ini, 20-ni aamma 30-ni akilersugassaapput. Taaneqartut kingulliit amerlanerpaanit toqqarneqartarput, Mads Andersen oqaluttuarpoq.
- Ineqarfissanik/illussanik takuniaagaanni illussanik tuniniaasartut tuniniaanermi akiligassanik allattuinermi taanna atortarpaat. Erniat procentip affaanut apparput, aatsaallu taama pilerinartigalutillu appasitsigipput, inuinnarnik sullissisoq oqarpoq.
Niuernikkut sorsuunnerup erniat sunnerpai
Danmarkimut Kalaallillu Nunaannut ineqarnermut Bank Nordikimi pisortaq Kim Kjølsen oqarpoq Nykreditimit taarsigassarsiat nutaat aggustip 9-anit neqeroorutigineqarsinnaalissasut. Aningaaseriviit marluullutik aamma DLR Kreditimit taarsigassarsiat isumagisarpai, kisianni DLR Kredit suli nalunaaruteqanngilaq.
Aktienik niuffaffimmi toqqissisimannginneq ernianik sunniisuuvoq. Ilaatigut Kinap USA-llu niuernikkut sorsuunnerannik peqquteqarpoq, inuinnarnik sullissinermut pisortaq Mads Andersen oqarpoq.